Ka jingduk ka dei ka thymei jong ka jingieit Ri, da u Babu kular khongjirem

Lehse, bun ki ban lyngngoh bad sngew phylla lada ong ‘Ba kajingduk ka dei ka thymmei ne ka kmie jong  ka jingieit Ri ha u Briew’. Hynrei lada pyrkhat bad tih bha (Analyse) ngi shem ba katei ka jingong ka kylla long pynban ka jingshisha ha ki liang baroh.

Dei ka jingduk kaba pynlong ia u briew ban trei shitom ban iakhun ne ialeh (Struggle) na ka bynta ban pyndap pynbiang ia ki jingdonkam jong u bad ia ka ïing ka sem baroh. Ka jingduk ka pynlong ruh ia u briew ban iabeh tynneng (compete) ban long lem uba stad bad uba riewspah ha ka jingim jong u. Un pyrshang keiñ ban thaw ki lad ki lynti (ways and means) kumno ban shem buit khnang ban plie ki lad ki lynti ban jop ia ka thong ba u la angnud (aim) ha ka jingim jong u.

Don bun ki briew kiba trei shitom ia kino kino ki jait kam khlem leh rain shuh khnang ban lait na ka jingduk ne ka jingiap thngan. Don napdeng jong ki kiba tyrwa shana, tyrwa biri ne sikret, tyrwa die waidong, tyrwa jhur, bad bun jait ki jingtrei barit baria. Kine keiñ kiba iarap ym tang ia ki, hynrei ki pynroi bad pynriew spah pynban ia ka Ri bad ka Jaitbynriew. Kynmaw bha, kano kano ka kam kaba phi trei ka dei kaba donburom. Kiei kiei baroh ki sdang na ibarit. Ia ka nongbah Rome ym shym la thaw tang ha ka shisngi. I jingjaw um ibarit,  shi-symboh-pa-shi-symboh I pynlong ia ka duriaw bah kaba iong jngum.

Kiba bun ki riew khraw kiba ieit Ri shisha ki dei kiba wan na ka longing longsem kaba duk bha.  Ki kmie ki kpa u Abraham Lincoln ki dei kiba shu bylla sngi kyndoi jakpoh bad kim ioh satia ban buh skul ia u namar ba ki duk palat. U Abraham Lincoln u la rai kut ban trei shitom bad trei minot khnang ban pyniaryngkat kyrdan  bad kiwei pat ki para briew.

Mano ban poi pyrkhat ba kum uta u briew un kylla long pynban u President ba  16 (Khadhynriew) jong ka Ri America (USA) ba khraw nam. Ki kmie ki kpa jong  u President A.P.J Abdul Kalam ki dei kiba duk bad kim poi pyrkhat satia ba kin pynmih ia u khun jongki u ban long u riewstad science (Scientist) uba khraw tam ha Ri India bad ha ka pyrthei hi baroh kawei.

U Prime Minister jong ngi, u Narendra Modi u dei tang u nongsam sha ha dukan. Mano ban poi pyrkhat ba un shong ha ka shuki Prime Minister jong ka Ri India mynta. Ha ri jong ngi pat , u Myllung Soso Tham u hap pep skul noh tang hadien ba u la pyndep ia ka Class VI hadien ka jingkhlad noh u kpa jong u ba ban palat ka jingduk. Dei ka jingduk kaba la pynlong ia u ban trei shitom haduh ba un kylla long u Myllung bad u nongthoh kot uba stad bad uba khraw tam ba ka Ri bad ka Jaitbynriew ka la pynmih kyrpang ia u. Na ki kam bad ki jingthoh jong kine ki riew khraw ka pyni shai kdar ba ka jingduk ka dei ka thymmei jong ki jingieit Ri lyngba ka hok bad ka jingshisha.

Lada phi long kiba heh ne kiba khraw, kiba nang ne kiba stad, kiba riew spah ne riew hajar kim lah satia ban ong ba ki ieit Ri tang ma ki.  Ka jingieit Ri ka shong ruh ha kiba rit baria, kiba duk basuk, lada ki leh ia ki kam ki ban pynmyntoi ia ka Ri bad Jaitbynriew.  Kam mut satia ba tang kiba nang ban pyrta ieit Ri ki dei kiba ieit ia ka Ri bad Jaitbynriew.

Don bun kiba ieit ia ka Ri bad Jaitbynriew da ka jingshakri kaba jar jar jong ki khlem da pynpaw ne sarong eiei. Kum kine ki briew ki ioh ia ka jingkyrkhu ha khmat u briew khamtam eh hakhmat u Blei. Ban pyrta ieit Ri bad Ieit Jaitbynriew lei lei tang na Stage ne Pandal, kata lei lei ka long kaba kham ma shuh shuh ioh ka mait pynban ia ki briew lajong. Ki Ingkhong shalangmat lei lei ki kham stad bad kham tbit bha ban pyrta Ieit Ri bad Ieit Jaitbynriew.

Ki kam barit baria ruh ki don la ka jong ka dor ban iarap bad kyntiew ia ka Ri bad ka Jaitbynriew. Ka jingieit Ri da ka jingsarong kam ju poi shano shano ruh. Ka jingshakri ia ka Ri bad ka Jaitbynriew da ka pisa tuh ne ka pisa thok bad ka pisa ioh ei, kata lei lei kan pynsniewdur bad bamkruin syndon ia ka Jaitbynriew jong ngi. Dei ban nang ban long kiba adkar, kiba im sngi, kiba kitkhia, kiba trei minot, kiba trei hok bad kiba kiar na ka jingleh arsap arphong, khnang ba ngin ioh shisha  ia ka jingieit Ri kaba shisha. U President Rosavelt ka America u ong, ‘Wat ju khmih lynti aiu ka Ri kan leh na ka bynta jong ngi, hynrei aiu ngin leh na ka bynta ka Ri?

What Next?

Recent Articles

Leave a Reply

Submit Comment
*