Shillong, Rymphang 21: Mynta ka sngi ka kynhun jong ki seng bhalang hapoh jong ka Confederation of Meghalaya Social Organisation (COMSO) kila pynlong ia ka jingialang kaba kyrkih ban ia kren halor ka jingbym hun ka jong ki ia ka jingmih na ka jingiakynduh ka sorkar Meghalaya Democratic Alliance (MDA) ia u myntri kam poh iing u Amit Shah halor ka ILP.
Haba kren haki lad pathai khubor ha dien ka jingialang u Chairman ka COMSO u Bah Robert June Kharjahrim u la ong ba ha kane ka jingialang kaba kila ia kynduh mynta ka sngi kila shim ia ka rai ba shuwa ba kin iaid sha khmat bad ki jingiakhih kiba kham tyngeh ban pynpaw sha ka Delhi ba ka jylla Meghalaya ka don kam ia ka ILP, kum ka seng kan ia mir jingmut shuwa bad ki khraw pyrkhat jong kane ka jylla.
Ka COMSO kan sa thoh shithi sha kine ki khraw pyrkhat ha kine ki sngi, kita kin long ki IAS bala shongthiat, ki riew rangbah kiba dei na ka liang jong ka sain pyrthei, ki ophisar, ki hikai ha ki University bad ki College kum ka kynhun kan sa ia kynduh ia kine ki khraw pyrkhat ha ki ar tylli ki jaka, ha Shillong na ka bynta ki lum khasi bad ha Tura na ka bynta ki lum Garo.
Ha dien ba ka seng kala dep ban ia mit jingmut bad kine ki khraw pyrkhat kin sa ia kynduh biang ban shim ia ka rai kumno ban iaid sha khmat ha ki jingiakhih ban pynbor ia ka sorkar pdeng ba ka dei ban sngewthuh ia ka jingdon kam ia ka ILP ha kane ka jylla Meghalaya. Kane kam kam dei kaba suk dei na kata ka daw don kam ruh ia ka jingai jignmut ki riew shemphang.
Kum ka kynhun kin sa ia kynduh ruh ia ki khlieyh nongsynshar, kum ki Syiem, ki Doloi, ki Sirdar, ki rangbah shnong ban ia kren bad ki bad ha ka juh ka por ban pan ka jingkyrshan na ki ha kane ka jingiakhih kaba mynta ban pynthikna ba ka sorkar pdeng ka dei ban ai ia ka ILP ha kane ka jylla Meghalaya.
Ha kane ka jingiakhih kaba mynta kin pynsngew sha ki paidbah ba kin don ia kata ka jingsngew long trai ba ka dei ka jingiakhih ka jong ki, lada ka sorkar pdeng ka lah ban ai ia ka jylla Manipur kan eh aiu ban ai ia ka jylla Meghalaya ha kaba ki dei ki juh ki rit paid kiba don kam ia baroh ki jingiada ban lait na ka jingshah tyllep ha ki heh paid.
Haba ia dei bad ka jingiakhih ban leh ia ka ‘Direct Action” ka kynhun kan dang iaid sha khmat bad mynta kan poi sha ka bynta kaba ar, kaba nyngkong kaba ki la leh ka long da ka jingiatreilang bad ki briew jong ka tnad Infiltration bad mynta pat ka jingkhynra kan long ryngkat bad ki briew jong ka Labour Department jong ka sorkar jylla bad kum juh jong ki District Council.
