Shillong, Risaw 01: U Bah Renikton L Tongkhar MLA jong ka Mawkyrwat u ba dei ruh u General secretary jong ka party HSPDP ba ia don lang ha kane ka sorkar MDA u la ong ba ka jingiakhih ka MEMRIWU kala ktah ia ki paidbah, ka sorkar ka dei ban pynbeit ia kane ka jingeh.
Haba kren ha u SP News Agency, na ka liang jong u Bah Renikton u la ong lada ka GVK kompnei kaba peit mynta ia ka jingpyniaid ia ki 108 ambulance kan lah ban pyniaid ha ka rukom kaba dei ka sorkar kala dei ban aiti noh sha kawei khnang ba ki paidbah kin nym jynjar.
Haba ia dei bad ki jingeh kaba ki nongtrei ka RMRI kila buh ha khmat ka sorkar, ka sorkar ka dei ban peit bad dei ban ia pynbeit khnang ba ki paidbah kiba don kam ia ka jingshakri jong kine ki 108 Ambulance ha kaba kit ia ki ba pang ba shitom kham tam ha ki nongkyndong kin nym ia kynduh jingeh.
Na ka liang jong u kum u nongialam jong ka party HSPDP ba don lang ha kane ka sorkar u kyntu ia ka sorkar ba ka dei ban pynbeit kloi lan ia kane ka jingeh kaba ki nongtrei ka EMRI kila iakhih mynta la ar sngi na ka bynta ka jingmyntoi jong ki paidbah bad lada ka GVK kam sngap ia ka sorkar dei ban weng bad aiti noh sha wei ban pyniaid ia ki 108 Ambulance.
