Shillong, Risaw 25: U Myntri rangbah ka jylla u Conrad K Sangma u la ong ba ka jingiakhun ia ka ilekshon hapdeng ki party kiba don lang ha ka sorkar ka long kaba bha namar kum ki party ki don la ki jong ki rukom pyrkhat bad ki hap ban pynpaw ia ka jingsngew ka jong ki.
Haba jubab ia ki jingjylli, na ka liang jong u myntri rangbah ka jylla u Conrad K Sangma, u la ong haba poi sha ka sorkar pat kan nym don kano kano ka jingktah namar haba ki shim ia kano kano ka rai kum ka kynhun ki shim da ka jingpyrkhat na ka bynta u paidbah.
Haba phai sha u Bah Balajied Kupar Synrem u ba la jop ia ka ilekshon shiteng samoi u la ong ba ka sorkar kan pyndon kam ia ka sap ka phong bad ka jingnang jingstad jong u na ka bynta ka jingdon kam ki paidbah bad ka jingjop da kaba tam bun ka kren shai ia ka jingshaniah jong ki paidbah ha une u rangbah.
U Bah Metbah Lyngdoh president jong ka UDP u ba dei ruh u shongknor ka iing dorbar thawain ka jylla u la ong ba kum ka party haba ka leit ban ialap ia ka ilekshon ha kine ki sngi kim shym la kren ei ei ha kaba ia dei bad ka District kaba thymmai bad kam long ruh kaba bha ban shu kren tang ban ioh vote.
