Shillong, Lber 17: U bah Paul Lyngdoh myntri ka sorkar la pyntip ba ka jingialang ka kabinet kaba la shong mynta ka sngi kala pdiang ia ka jingkren kaba u Lat ka jylla un sa kren hapoh ka iing dorkar ha ka dorbar ba nyngkong jong u nsme.
U bah Paul Lyngdoh la iathuh ba ki katto katne ki mat kiba la kdew ha ka jingkren jong u Lat ki long halor ki kam kiba ka sorkar kala pyntrei bad kaei kaba ka sorkar kan don ban leh ha kane ka snem mang tyngka kaba mynta.
Ha kane ka jingkren jong u Lat ka jylla la kdew ruh ia ka jingiakren ia suk bad ka seng HNLC kaba ka jingiakren ia suk ka dang iaid sha khmat, ka don ruh ka bynta ha kaba ia dei bad ka kam pynbeit pud bad ka sorkar Assam.
Haba ia dei ka kam drok ka sorkar kan shim ia ka rai ban ia khun pyrshah ia kane ka jingdih drok bad ban ia khun pyrshah da kaba tyngeh bad ka sorkar kan nym map iano iano ruh ha kane ka jingiakhun pyrshah ia ki kam drok.
Kitei ki long ki katto katne ki phang kiba don ha ka jingkren u Lat, nalor kitei ki don ruh bun kiwei kiwei ki kam kiba ka sorkar kan pyntrei ha kane ka jylla ia kaba u lat ka jylla un sa kren hapoh ka iing dorkar la sngi nyngkong.
