Shillong, Nailar 31: Ka Confederation of Ri Bhoi People (CoRP) seng kmie ka pynrem jur halor ka jingleh donbor ki pulit Assam ia ki paradoh para snam ha Block-II ban shoh ia ar ngut ki samla Khasi ha shnong Umlaper, Block-II kaba hapoh Ri Bhoi District.
Na ka liang ka seng ka pynpaw ia ka jingsngewkhia halor kane jingjia ia ki paradoh para kiba shah thombor ha ki bor kiba bat ia ka ain ha kti, ki pulit Assam ha jaka ban peit ia ki riew sniew nongpynkulmar shnong na bynta ka suk sain ki paidbah, hynrei ki pulit kiba don ha katei ka jaka ki long pynban ki long ki nongpynkulmar shnong.
kumta ka pynrem jur ia ka jingleh ki pulit Assam bad ka dawa ban weng mardor ia ki pulit na ka shnong Umlaper ban wanrah biang ia ka shongsuk shongsain watla katei ka jingjia ka dang rhem napoh.
Kum ka seng ba Peitngor ia ka imlang sahlang bad ka roi ka par ha them ri Bhoi, ka kyntu ia ki paradoh para snam ha Blok-II ban iatylli kawei kum ki nongshong shnong ban khanglad ia ki bor sorkar ne kiwei ki kynhun kiba wan ban thombor ban shim kabu namar ka dei ka jaka iaknieh hapdeng ka Meghalaya bad Assam.
Lah ban pynpaw ha ki snem ba la dep ki don ki kynhun ba thombor ia ki paradoh para snam ha Block-II, da kaba dawa pisa na ki paidbah na ki marrep bad kiwei ki kam ki bym iahap ha ka imlang sahlang kaba ktah ia ki kup shiliang sem shiliang kiba im ja jakpoh na ka rep ka riang ne ki kam khaii jong ki.
Ka seng CoRP ka kyntu ia ki paidbah nongshong shnong ha Block-II ban don ka mynsiem jingiaieit kum shipara ban wanrah ia ka shongsuk shong sain ha katei jaka, kaba don hapdeng ka saw ka sian na jingiaknieh hapdeng ka jylla Assam bad Meghalaya.
Namar naduh ba ioh ia ka jylla Meghalaya ki nongialam ki la shu hun ba la ioh jylla bad ki klet noh ban pynbeit ia u pud u sam ka jylla, dei halor kane nongrim ki mih ki jingiakajia pud hapdeng kine ar tylli ki jylla haduh mynta ba ka Meghalaya ka la kynjoh sha ka 49 snem bad kan rakhe ia ka jingdap 50 snem ha u 2022.
Ha kajuh ka seng ka pynpaw ka jingsngewnguh ia ki bor district Ri Bhoi kynthup ka Deputy Commissioner, ki pulit bad khamtam u MDC jong ka Mawhati konstitwensi bah Charles Marngar kiba la leit mar mar sha katei jaka ban tuklar lem halor katei ka jingjia ban pynjai jai ban wanrah ia shongsuk shong sain ia ki paidbah ha shnong Umlaper bad ia baroh ki paidbah ha Block-II.
Ka seng ka kyntu ia baroh ar tylli ki sorkar jylla, ka Meghalaya hapoh ka jingialam u Myntri Rangbah Conrad K Sangma bad ka Assam hapoh ka jingialama u Himanta Biswa Sarma kum u Myntru Rangbah ba kin shimkhia kumba ki la kren ha ki lad pathai khubor ha ki ar tylli ki jingialang ha Shillong bad Guwahati ban pynbeit noh ia u pud u sam.
khnang ba ki paidbah ha ki shnong khappud ka Ri Khasi-Jaintia kynthup ka shnong Umlaper, Ummat, Jatalong ha Block-II kiba don mynta hapdeng ka jingshong syier na ka jingshah thombor ha ki bor sorkar ka Assam na ka jingieh khunswet ka sorkar jylla ba kin im suk im sain ha la ki iing ki sem bad kin lait lait na ki kam shah thombor ha la shong la thaw.
Kum ban pynpaw ha ka jingialang ha Guwahati, ki ar ngut ki Myntri Rangbah ki kren ban pynbeit shwa ia 6 tylli na ki 12 tylli ki jaka iaknieh pud Meghalaya-Assam, bad ki la ong ba ki kloi ban leit jurip lang ha kitei ki jaka lada donkam nalor ki dkhot ka Kommiti.
kaba lyngngoh haduh mynta kim pat leit jurip ia kitei ki jaka khappud da kaba ai daw na ka khlam Covid, hynrei ha Delhi ym don khlam Covid ia ka leit ka wan ki Myntri sorkar katba ha jylla ka khlam Covid ka ktah jur ia ki paidbah ban duh ia ki kam jam khamtam ki nongbylla sngi.
“Ka sorkar kam dei ban pynbun meeting iakren kam pud ha Secretariat ne ha ki iing paki dulan ban iadih iabam para baheh tang ban pynbiej ia ki paidbah. Ka CoRP ka dawa ba ka jingiakren pynbeit Meghalaya-Assam ka dei ban pynlong beit ha ki shnong khappud kumba ka sorkar MDA hapoh ka jingialam u Conrad K Sangma ka lah ban pynlong ia ka jingialang ka kynhun myntri ha ki District ka jylla kan eh aiu ban pynlong ia ka jingiakren kam pud ha Umlaper, Iongkhuli bad ha Langpih, West Khasi Hills”.
Kane ka long katkum ka kyrwoh ba la phah da u Bah Gershome Hat Vice President CoRP Sengkmie bad bynrap lada ka sorkar MDA lah ban pynbeit ia u pud u sam kumba ki paidbah ki angnud shwa ka jingdap 50 snem ka jylla kan long ka jingkmen ia ki paidbah thain khappud ryngkat shityllup ka jylla ban iakmen lang ha ka jingrakhe dap 50 snem ka jylla.
