Shillong, Jylliew 08: U president jong ka party National People’s Party u Conrad K Sangma u ba dei ruh u myntri rangbah ka jylla Meghalaya, haba kren a ka jingialang ba nyngkong jong ka NPPNECC mynta ka sngi u la ong ba da ka jingioh jong ka party ia ka kyrdan “National Party” ka long ba mynta la lah ban pynsngew kham bha hapoh parliament ia ki jingeh ka dong shatei lam mih ngi jong ka Ri India.
Ha kane ka jingialang u la batai ba da ka jingioh ia kane ka kyrdan, ka sorkar India haba kan khan ia kino kino ki jingialang kiba ktah ia ka rai ka NPP mynta kala ioh lang ban ia don lang ha kum kine ki jingialang kiba kyrpang kum ka National Party, khamtam eh haba ia dei bad ka shongsuk shongsain ha ka Ri.
Kum ka National Party ka sorkar pdeng kan ai ia ka ophis treikam jong ka party hapoh jong ka nongbah Delhi, ym tang kata ka party kan ioh ruh ia ka kamra la ka jong hapoh parliament. Kane ka long ka party kaba nyngkong na North East ban ioh ia kane ka kyrdan National Party.
Ha ka juh ka por u la kyntu ia ki nongialam jong ka party ba kane ka long tang ka jingsdang bad kaba kongsan mynta ka long ba kum ki nongialam jong ka party kin hap ban peit haei ki don ki jingduna khang bay n lah ban dang pynkhlain shuh shuh ia ka jingtrei kam jong ka party.
Kane ka jingioh ia ka kyrdan National Party mynta ia ka shap jong ka kot la buh kyrpang ia ka party NPP ha ka ri baroh kawei bad haba don kino kino ki election ym don shuh ban buh shiphew ngut ki nongtyrwa ban ia khun ia ka ilekshon hynrei la don kam tang u wei u nongtyrwa.
Na ka liang jong u Cornad mynta ka sngi u la pynpaw ia ka jingsngewnguh ia baroh ki paidbah jong ka dong shatei lam mih ngi jong ka Ri India kiba la ai ka jingkyrshan ia kane ka party bad kyrpang ia baroh ki nongtrei jong ka party, ia ka MP na Tura, ki MLA bad ia baroh kito kiba la ia khun wat la ki khlem poi sha ka thong ruh ki ruh kila noh syniang lang ban pynlong ia ka NPP kum ka National Party.
