Ka jingkhang ban ia kren ia suk bad ki lehnoh ka plie lada ki sangeh ia ki kam beain: Conrad

Shillong, Kyllalyngkot 26: U Myntri rangbah ka jylla ha ka jingkren jong u ha ka sngi burom jong ba 71 snem ka Republic Day jong ka Ri India ha Madon polo u la ong ba ka sorkar kala buh ia ka thong ban pynlong ia ka Meghalaya ha u snem 2030 ba kan dei ka jylla kaba riewspah napdeng ki jylla ha ka Ri India.

Ban pynurlong ia kane  ka sorkar kala buh ia ki hynriew tylli ki mat trei kam bad kita ki long ban kyntiew ia ka long briew man briew, ban pynkhiim ia ki kam kiba la juh don bad trei, ban dang pynbun ia ki jingtei, ban kyntiew ia ka seng kam seng kam, ban iada ia ka mariang bad da kaba wan rah ia ki jingpynkylla ha ka rukom trei kam jong ka sorkar.

Ban pynurlong ia kane ka sorkar kala leh shibun ki kam ha kine ki ar snem bad kan dang iai beteng ia kine ki kam ha kine ki lai snem ki ban dang wan namar ka don ka jingthmu kaba shai kdar ba wat ha pdeng ki jingeh kin ialeh ban iaid sha khmat ban poi sha ka thong.

Haba kren halor ka Citizenship Amendment Act, 2019 kaba la pdiang da ki ar tylli ki iing dorbar thawain jong ka Ri India u la ong ba ia ki jaka kiba hap hapoh jong ka Sixth Schedule la pynlait na katei ka ain hynrei ka sorkar ka kwah ba ia ka jylla Meghalaya dei ban pynliat na katei ka ain baroh kawei ka jylla.

Dei halor kane ka nongrim ba ka sorkar kala khot ia ka dorbar ba kyrpang ha u bnai Nohprah 19 tarik ban shim ia ka rai ba dei ban pyntrei kam kam ia ka Bengal Eastern Frontier Regulation, 1873 kaba la ia tip kum ka Inner Line Permit ban pynthikna ba ki paidbah jong ka jylla kin ioh ia ka jingiada kaba pura bad ia kane mynta ki dang ia kren bad ka sorkar pdeng.

Ha kane ka sngi leh burom ia ka jingdap 71 snem jong ka Republic Day ba ka Ri India kala ioh ia la ka jong ka riti synshar u myntri rangbah u la kynmaw burom ia ki riew ialeh laitluid ban pynioh ia ka jinglaitluid na ka jingsynshar ki nongwei, kum u Kiang Nangbah, U Tirot Singh, u Pa Togan N Sangma na kane ka jylla bad shibun kiwei kiba la aiti iala ka jingim ban pynioh ia ka jinglaitluid na ka jingsynshar ki nongwei.

Haba phai sha ka shong suk shong sain ha kane ka jylla, u myntri rangbah u laong ba ka jylla ha u snem 2019 kala ioh ia ka shong suk shong sian ha kaba la ioh ban rakhe ia baroh ki jinglehkam  ha ka rukom kaba biang. Haba phai sha ki kam lehnoh u la ong ba la lah ban tehlakam ia ki.

La don ruh ki kynhun lehnoh kiba la pynpaw ba ki kwah ban poi sha ka miej jingiakren. Haba ia dei bad kane u myntri rangbah u la ong ba ka jingkhang jong ka sorkar ban ia kren ka suk ka plie, hynrei kan long ba kito kiba kwah ban ia kren ia suk ki dei ban pynkut ia ki kam beain jong ki.

Ha ka sngi rakhe ia ka Republic Day u myntri rangbah ka jylla u la kdew ia kiwei kiba ka sorkar ka thmu ban leh na ka bynta ka jylla bad ha ka jingkren jong u la mait phang ia baroh ki kam pynroi, naduh ka pule puthi, ka Umbam Umdih, ka khaii pateng, ki surok, ki lat ki lynti ban kyntiew ia ki samla.

My myntri rangbah la pynpaw ia ka jingleh jong kane ka sorkar ban kyntiew ia ki lad seng kam seng jam na ka bynta ki samla ba kin wan sha khmat. U myntri rangbah u ngiet skhem ban kyntiew ia ka ioh ka kot jong ka jylla dei tang da kaba ia mih khmat ban seng ia ki kam ki jam kiba ka jylla ka don ia la lad ban leh ia kane namar ka don ia ka suin bneng kaba biang bad ki lat ki lynti kiba bun.

U myntri rangbah u la kdew ba ki kam jngohkai pyrthei kan long kawei ka pdeng kaba lah ban kyntiew ia ka ioh ka kot ha ka jylla ia kaba ka sorkar kala shim khia ban kyntiew ia ka. Kawei pat kaba ka jylla ka don ka dei ka riaw ka siew bad ka riam ka beit. U mytnri rangbah u la pynpaw ia ka jingsngew kmen namar mynta kila don shibun ki kynhun ia treilang ban kyntiew ia ka ioh ka kot. U myntri rangbah u la kyntu ia baroh ban aiti ia lade na ka bynta ban kyntiew ia ka jylla ha ki liang baroh.

What Next?

Recent Articles

Leave a Reply

Submit Comment

*