Shillong, Jymmang 16: U symbut myntri rangbah ka jylla u bah Prestone Tynsong u la ong ba ka jingkhang jong ka sorkar ka plie ba ki dkhot jong ka seng HNLC kin wan ban aiti kumba leh u General Secretary jong ka seng ha kine ki bnai kiba la dep.
U Bah Prestone u khot u wer ia ki dkhot jong ka seng HNLC ba kin wan sha khmat ban ia treilang na ka bynta ka bha ka miat jong ka jylla baroh kawei. Haba ia dei bad ka jingpahara ha khappud u symbut myntri rangbah u la ong ba kane ka dei ka kam jong ki BSF ha khappud ban peit.
Haba ia dei bad ka jingjia ha shnong Lapalang, na ka liang jong u Bah Prestone u la ong ba u phah ia ka jingsngewlem sha kiba ha iing ha snem bad halor kane ka jingjia ka ain kan sa leh ia kaba don kam.
