Ka jingkhlad jong u Dr Donkupar ka dei ka jingduh kaba khraw ia ka jylla: Tathagata Roy

Shillong, Naitung 29: U Lat jong ka jylla Meghalaya u Tathagata Roy mynta ka sngi u la leit ban jngoh pyndon burom ia u Dr Donkupar Roy bam kwai ha dwar  u Blei ha iing sah jong u ha Pine Mount Ridge ban burom ia une u rangbah u la la khlad khlem pat dei por.

Ha ka jingkren jong u Lat ha ki lad pathai khubor ha dien ba u la pyndep ia ka jingleh burom ia u tei u nongialam, u la ong ba u Dr Donkupar Roy u la pynin ia ka jinglong nongialam ka jong u na ki kam kiba u bat, ha kine ki jinglong nongialam jong u u la bat ia ka kam myntri rangbah ha ka jylla, kum u president jong ka party UDP bad kum u Speaker ka iing dorbar kane kala kren shai ba u long shisha u briew ba khlraw.

U la iathuh ba ka jingiakynduh bad u markhmat ka long ha Kolkatta ha kaba kila ia kren bun ki kam, hynrei kane ka jingkhlad kyndit jong u ka long ka jingduh kaba khraw ia ka jylla, kane kan wan rah shipor ia ka jingduh ha ka sian pyrthei. Na ka liang jong u Lat ka jylla u la pynpaw ba hapdeng kane ka jinglongkot jong ka por u la pynpaw shisha ia la de kum u nongialam.

Na ka liang jong u Myntri rangbah ka jylla u Conrad K Sangma ha ka jingkren jong u la pynpaw ia ka jingduh kaba khraw ia ka jingduh noh ia u Dr Donkupar Roy, namar u long shisha u nongialam u ba jai jai bad u ba kloi ban sngap ka jingduh ia u ka long ka jingduh kaba khraw ia ka sorkar MDA.

La ong ba u kpa jong u u Purno A Sangma bad u Dr Donkupar ki don ka jingiajan bad kane ka jingiajan jong ki kala pynlong ia u ban iathuh ithaw naduh ki por mynshuwa , u myntri rangbah u la pynpaw ka jing sngewsih halor ka jingkhlad kyndit jong u Dr Donkupar Roy.

U nongialam ka liang pyrshah u Dr Mukul Sangma u la ong, ka long kaeikaei ka ba sngewsih ban duh ia u nongialam u ba la ih bha , u don ka mynsiem kaba shida bad u long u nongialam uba ki lah ban shaniah ia ka jingialam lynti ban tei ia ka Jylla.

Ha kane ka sngi kiba la ia poi sha iing jong u Dr Donkupar Roy ban pyndon burom ia u kum u nongialam ki long u Deputy Speaker ka iing dorbar thawaiñ ka jylla u Timothy D Shira, ki myntri jong ka sorkar jylla, ki MLA bad ki nongialam seng sain pyrthei.

Ia ka met jong u Dr Donkupar Roy la wanrah mynta ka sngi na Delhi sha Shillong, ymbuh mynta ka miet ha Shillong, la shai ka sngi rah sha iing shah jong u ha Sohra bad ka jingtep kan long ha shnong jong u ha Shella ha ka sngi Balang.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet