Shillong, Iaiong 07: U Lampha
ng ka ïingdorbar thawaiñ ka Jylla uba long ruh u MLA ka Mairang konstitwensi u bah Metbah Lyngdoh mynta ka sngi u la ong, ka jingbym don jong uwei ruh u nongshong shnong ka jylla ban ïoh ïa u khniang jingpang kadei na ka jingkohnguh jong ki paidbah ïa ki jingbthah bad ka jingai jingmut jong ka sorkar jylla.
“Nga sngewnguh shisha ba um don uwei ruh uba ïoh kem pang na u khniang jingpang Coronavirus hapoh ka jylla, bad nga ai khublei ïa baroh ki paidbah bad ki bor sorkar kiba la trei shitom ban khanglad ïa u khniang jingpang ba un saphred hapoh ka jylla,” ong u Lamphang ha ka jingïalang kaba la long ha Mairang ha ka jingdonlang ki Sordar shnong bad ki ophis sorkar.
Na ka liang u bah Metbah u la ong, lada ki paidbah hi kim pdiang ïa ki jingai jingmut jong ka sorkar bad ka tnat ka koit ka khiah, katta khlem pep u khniang COVID-19 u la ïoh ban saphriang bad saphred ha baroh kawei ka Jylla.
U MLA ka Mairang hynne ka sngi u la pyndep ruh ïa kawei ka kamram ka jong u kum u nongmihkhmat ha kaba u la pynpoi ïa u khaw uba don haduh 23000 kilo gram na ka bynta kito ki longïing kiba ym don pisa ban thied bad kumjuh ruh ban bam.
Katkum ka jingpyntip jong u MLA ka Mairang, ïa une u khaw la noh synniang khlem ka jingsiew dor pisa eiei hynrei la aiti ha ki nongpynïaid shnong da kaba kyrpad ba kin sam hok ha ka jingstad bad jingpeit bishar sha ki longïing kiba i donkam palat bad ki bym don shuh wat ïa u khaw ban bam lane ka pisa ban thied.
U bah Metbah haba kyrpad ïa ki Sordar, ki nongpynïaid shnong, u la ong, ngam kwah ba ki nongshong shnong kin shah thngan lane ban ïap thngan ha ka por ba ka Ri India baroh kawei ka don ha ka jingkhang shnong na ka daw jong ka jingsaphriang jong u khniang jingpang Coronavirus.
Ha kawei ka liang, ki sordar bad ki nongïalam shnong ki la pynpaw ïa ka jingsngewnguh kylla sha u MLA ïa ka jinglah jong u ban khmih bniah na ka bynta ki longïing kiba kyrduh bad ban pynpoi syndon da u khaw sha ki long ïing kiba ïa kynduh jingeh bad kiba ym don pisa.
