Shillong, Jymmang 11: Ka thang ban pynlong ia ka Ri India kaba khuid ka dei kaba la sdang da u myntri rangbah duh jong ka Ri India u Narendra Modi ha ka 2nd Risaw 2014 da ka jingthmu ban pynlong ia ka Ri India kaba khuid naduh ki jaka sor haduh ki nongkyndong.
Ka tnad Directorate jong ka Employment bad Craftsmen Training (DECT) ryngkat bad ka ophis jong ka ophis personals bad Project Management Unit kaba kyrshan ia ka Supporting Human Capital Development in Meghalaya (SHCDM) Project kala pynlong ia ka jingpynkhuid ia ki sawdong sawkum jong ka ophis da ka jingiatreilang bad ka Shillong Municipal Board, ka tnad pynlip ding jong ka jylla Meghalaya.
Haba kren shuwa ban sdang ka jingpynkhuid ia ki sawdong sawkum jong ka ophis u Director jong ka Employment bad Craftsmen Training, U B. Hajong, MCS u la ong ba ka long kaei kaei kaba don kam ban pynrung ia ka jinglehkhuid kam dei tang ha iing ha sem hynrei wat ha ki jaka trei ruh kum juh.
U la ong ba ia kane ka jingleh khuid ka dei ban rung ha baroh ki nongtrei jong ka sorkar ban pynlong ia ka Ri India kaba khuid ba suba, u la ong ba ka jingleh khuid kan ialam ruh sha ka jingtrei bha ia ka kam ban iarap ia ki paidbah haba ki wan ban don kam. Ka long kaba kongsan ban ia shim ia ki jinghikai iwei na iwei.
Na ka liang jong ki nongtrei hapoh jong kane ka ophis kila shim ia ka rai ba kin pynkhuid ia ki sawdong sawkum jong ka ophis ar sien ha ka shisnem. Ha kane ka sngi baroh ki nongtrei ha katei ka ophis kila shim khia ban ia trei bad pynkhuid ia la ka jong ka ophis kaba ki leit ban trei man ka sngi.
