Shillong, Naitung 01: Ka kong Dari Uriah ba shong sah ha Jaiwlaitdom Umphohliew ka ba trei kum ka nongthoh khubor ha ka kot khubor Kynjatshai kala khlad noh mynta ka sngi ha dien ba ka jingpang kala bat ia ka katto kane por. Ka jingleit on tep kan long ha ka sngi thohdieng ha u Lum jongtep jong ka Balang Katholik ha Lawmali. Ka kong Dari ka dei ka khun jong ka kong Libon Uriah.
Na ka liang jong ka Shillong Press Club mynta ka sngi kala phah ia ka khubor sngewlem sha kiba ha iing ha sem halor kane ka jingkhlad ba kyndit jong ka Kong Dari Uriah, ha kane ka jingphah sngewlem na ka liang jong u president jong ka SPC u Bah David Laitflang u la ong ba ka long ka jingduh kaba khraw ia ka SPC bad kumwei na ki riew kynthei kiba don ha kane ka kam thoh khubor.
