Shillong, Naitung 07: U Symbut Myntri Rangbah ka jylla u Bah Prestone Tynsong mynta ka sngi la ong ba ka jinglong jingman ha ka jylla kam long kaba shngain, la kyrpad ia ki paidbah ba kin kiar na kaba mih shabar lait noh tang haba don kam ban leit.
“ Nga kyntu ia baroh ki paidbah nongshong shnong kiar na kaba wan sha Shillong ne leit sha Nongpoh, kiba wan sha Shillong bad kiba leit sha Nongpoh ruh dei tang kiba don kam eh kiba ym lah ban kiar”, la ong u Symbut Myntri rangbah ka jylla.
Ha ka juh ka por u symbut myntri rangbah ka jylla u la pynsngew sha ki paidbah nongshong shnong ka jylla ba kim dei ban don kano kano ka jingsngew syier namar ka sorkar ka dang lah ban teh lakam ia kane ka jingpang, ha ka juh ka por ki paidbah ruh ki dei ban bud ia ki kyndon kiba ka sorkar kala dep ban bthah na ka por sha kapor.
Haba jubab ia ki jingkylli hato ka sorkar kan dang pynjari ne em ia ka jingpakhang, na ka liang jong u Bah Prestone u la ong ba ia mynta kam don kumta kata ka jingpyrkhat na ka liang jong ka sorkar, hynrei lada ka kam ka dawa ka sorkar kan sa peit ia kaba don kam.
Haba ia dei bad ka jinglah ban test ia ka RTCPR ha ka jylla Meghalaya man ka sngi la lah ban test haduh 645 tylli ki test, kata ka long ha NEIGRIHMS, Civil Hosptial Tura bad Pasture Instituted Lawmali Shillong.
