Ka jinglong jingman jong ka khlam Avian Influenza ha ka ri

Delhi, k. Lyngkot 9: Hadien ka jingpynshisha da ka ICAR-NIHSAD ba ka don ka khlam ha ar tylli ki jaka ri syiar ha Panchkula distrik ka Haryana bad ka jingioh jingtip shaphang ki case positive ha ki sim ha Junagadh distrik ka Gujarat bad ki tyngab ha Sawai Madhopur, Pali, Jaisalmer bad Mohar distrik ka Rajasthan, ka tnat ka la ai jingmut ia ki jylla kiba la shah ktah ba kin tehlakam ia kane ka khlam katkum ka rukom leh pyrshah ia ka Avian Influenza.
Haduh mynta, la pynthikna ba kane ka khlam ka la ktah ia 6 tylli ki jylla (Kerala, Rajasthan, Madhya Pradesh, Himachal Pradesh, Haryana bad Gujarat). La bna ruh ba la sdang ia ka jingpyniap ia ki jingri ha ki ar tylli ki distrik ka Kerala kiba la shah ktah. Ka jingsynreit dawai ha kine ki jaka ruh ka la sdang.

La bthah ruh ia ki jylla ki bym pat don jingktah na kane ka khlam ba kin long kiba husiar bad ba kin peit thuh ia kano kano ka jingiap jong ki syiar ki han bad ban ai jingtip mardor lada lap ia kum kane khnang ban lah ban shim ia ki sienjam ha ka por kaba biang.

Ki kynhun ka Sorkar Pdeng ki la leit sha ki jaka ba shah ktah ha Kerala, Haryana bad Himachal Pradesh khnang ba kin ioh peit ia ki kam ha kine ki jaka bad ba kin lah ban leh ia ka jingwad bniah epidemiology.

La ioh jingtip ruh shaphang ka jingiap 16 tylli ki sim ha ka DDA park ha ka shnong Hastsal ha Delhi. Ka tnat AH jong ka Delhi, ka la shim ia ki sienjam ban ai jingiada bad ka la phah ia ki sample sha ka ICAR-NIHSAD bad mynta dang ap ia ki jingshem jong kine ki test.

Ka jingai jingtip ia ki nongri syiar had han bad ruh ia ki briew baroh (khamtam kito kiba bam ia ki pylleng bad ka doh syiar) ka long kaba donkam bha mynta. La phah ruh ia ka jingpynbna na u Secretary (AHD) sha ka tnat ka koit ka khiah jong ka Sorkar Pdeng ban wanrah biang ia ka jingsngew shngain ban bam ia ki pylleng bad ki syiar.

La kyntu ia ka tnat ka koit ka khiah ba kan ai ia ka jingpynbna ha kane ka kam khnang ba ki briew kin ym shah ktah da ki khubor lamler. Shuh shuh, la kyntu ia ki jylla ba kin kyntiew ia ka jingtip shaphang ki syiar ki han bad ki pylleng kiba long kiba biang ban bam hadien ba la dep shet bha bad la kular ba ka Sorkar Pdeng kan kyrshan ia kine ki sienjam.

What Next?

Recent Articles

Leave a Reply

Submit Comment

*