Shillong, Nailur 24: U Secretary jong ka AICC u Zenith Sangma mynta ka sngi u la ong ba ka “Farm Bill” kaba la wanrah da ka sorkar BJP hapoh parliament ha kine ki sngi shong dorbar kan ktah ia ki nongrep jong ka Ri India, ia kane ka jingshah ktah yn nym lah ban sngewthuh mynta hynrei suki ki paidbah nongrep kin sa sngewthuh ia ka jingeh.
U Zenith u la ong ba ha ka Bill kaba la pdiang hapoh parliament kam shym don ia kata ka kyntien kaba ong ka dor sorkar, haba kam don kata ka jingbuh dor na ka sorkar kumno kin ong ba kan nym ktah ia ki nongrep. Ki nongrep kin sa ia kynduh jingeh ha ki por ban sa wan.
U Zenith u nongialam ka seng Congress u la kynnoh ba naduh u snem 2014 haduh 2019 la ong ba palat ia ka 67000 ngut ki nongrep kila shim noh ia la ka jong ka jingim bad kat kum kane ka jingkhein ka long ba man la ka kynta u wei u nongrep u shim noh iala ka jong ka jingim.
La ong ba ki nongrep ki dei u pudlum jong ka Ri namar dei man ki kiba pynrpoi ia ki marbam mardih ha baroh kawei ka Ri, la ong ba ki nongrep bad ki iew ki hap hapoh ka jingpeit jong ki sorkar jylla bad baroh ia tip ba kumno ka Ri India ka long.
Kane ka sorkar NDA kala pdiang ia kane ka bill da ka jingle donbor khlem ia don ka jingiamir jingmut bad ki briew kiba trei ia kane ka kam khatam ki seng nongrep bad khlem da burom shuh ia ka Federal structure jong kane ka Ri.
Haba ia dei bad ka sorkar Meghalaya u Zenith u la ong ba kaei ka jinglap jong u Conrad K Sangma myntri rangbah ka jylla ban kyrshah ia kane ka Bill, leh se u khlem pat da pule bha ia kane ka Bill, ne tang ban pynsngewbha ia u myntri rangbah duh ka Ri u Narendra Modi.
U Zenith u la ong ba ka jingkhot ia kane ka jingiakynduh bad ki nongthoh khubor ka long ban pynpaw ia ka jingsngewsih ryngkat bad ki nongrep ha ka Ri India baroh kawei ha kaba ia dei bad kane ka “Farm Bill” kaba la pdiang jubor hapoh iing dorbar parliament la kynnoh.
Ha kane ka sngi la don lang ruh u Working President ka MPCC u Bah James Lyngdoh, u Bah Kennedy Khyriem nongai ktien ka seng Congress ha kaba kren ha ki lat pathai khubor mynta ka sngi ha Congress Bhavan Shillong.
