Williamnagar, Naitung 04: U myntri rangbah ka jylla u Dr Mukul Sangma haba plie iaka Chaiding Police Station ha East Garo Hills mynta ka sngi u la ong ba ka jingplie ia ki police station ka long ban wanrah ia ka jingsngew shngian ha ki liang baroh bad haba don ka jingshong suk ka roi ka kan sa paw sted ha ki liang baroh.
Ha ka 3th Naitung 2017 ka sorkar kala pynmih ia ka jingpynbna sorkar ban buh ia ka Chaiding Police Station bad kane ka police station kan peit ia ki 79 tylli ki shnong kiba hap hapoh jong ka Samanda C&RD Block ha kaba mynshuwa ki hap hapoh jong ka Songsak bad Williamnagar Police Stations. La ong ba shuwa ban buh ia kane ka police station ha kane ka thain ym don wat tang kawei ka police Unit ha kane ka surok bah na Jengjal sha Songsak.
U myntri rangbah u la ong ha kane ka jingialang paidbah ba ki paidbah mynta kin sa iohi ia shibun ki kam pynroi ha kaba ki Bank kin sa wan ban plie ia ki shnat jong ki namar mynta ia bun ki skhim jong ka sorkar la thep beit ia ka pisa sha ka account jong ki briew. Da ka jingdon jong kane ka police station ki Bank mynta kin sa wan ban buh ia ki jaka trei kam ki jong ki.
Haba ia dei bad ka rukom thung kam ha ki kam pulit mynta kan nym don lad shuh ban ialeh tuh, baroh ki samla kiba duna ha ka jingpule ruh ki lah ban ia kop ha ka juh ka kyrdan kumba long lang baroh. U la ong ba ka sorkar kan sa khot biang ia ka jingpynrungkam ha ka tnad pulit bad ki samla kane ka thian ruh kin sa ioh ia ka lad. U myntri rangbah u la kyntu ia ki pulit ba kin pynsngewthuh ia ki paidbah ha kaba ia dei bad ka ain.
Haka jingkren jong u DGP, u SB Singh u la ong ba da ka jingia trei lang bad ki paidbah ki pulit kila lah ban tehlakam ia ki kam leh noh ha East Garo Hills kaba dei ka jaka ba khlain jong ki seng lehnoh. Kiwei kiba la ia don lang ha kane ka sngi ki long u Parliamentary Secretaries, Noverfield Marak, Brigady Marak bad Sengnam Marak,, DIG Western Range, Mukesh Kr. Singh, Deputy Commissioner H.B. Marak, SPs bad ki police officer bad u DC ka East Garo Hills u la pule ia ka jingpynbna sorkar.
