Shillong, Rymphang 18: U bah Gavin M Mylliemngap MLA jong ka sohra u la ong ba dei ka jingtrei shitom jong ka North East Slow Food and Agrobiodiversity Society (NESFAS) kaba la pynlong ia ki briew ka thain Sohra ba kin pynneh pynsah ia ka rep tynrai kaba khlem pyndon kam sboh dawai.
U bah Gavin u la kren ia kane ka jingialang pyninam ia ki symbai rep kiba la wan ban pyni da ki nongrep ka thain Sohra kiba la don haduh sanpher jait ki jaitsymbai kaba ki nongrep ki la pynheh pynsan ha ka rep ka riang khlem da pyndon kam dawai bad kane ka wanrah ia ka rukom rep tynrai.
Ki kynhun iatreilang kum ka Iatreilang PGS, Ryntihlang PGS bad ka Kyntiewlang PGS kiba la iarap ban pynlong ia kane ka jingpyninam ia ki symbai kiba la pynmih na katei ka thain ha ka rep tynrai ka long ka kabu ia ki nongrep ban ia mit jingmut ha kaba ia dei bad ka rep ha ki dong ka thain jong ki.
Ki shnong kiba la wan ban ia shim bynta ha kane ka jingpyninam iaki symbai rep ki long ki nongrep na ka shnong, Laitumiong, Laitsohpliah, Lad Mawphlang, Dewlieh, Nongtraw, Mawmihthied, Mawkma, Nongpriang, bad Mustoh kine ki shnong ki hap hapoh jong ka Laitkroh C&RD Block bad ka Shella C&RD Block hapoh jong ka East Khasi Hills District.
U Executive Director jong ka NESFAS u Bah Pius Ranee, u la ong ba ki nongrep ha ka jylla ki ia kynduh ia kawei ka jingeh ka long ba kane ka rukom rep ka kham duna ka jingpynmih ia ki jignthung dei na kane ka daw kisa phai ban pyndon kam ia ki dawai ban pynbun ia ka jingmih na ka rep ia kaba ka NESFAS ka ialeh ban pynsngewthuh ia ka jingsniew na ka jingpyndon kam dawai.
