Shillong, Naiwieng 06: Mynta ka sngi la plie ia u dur mot ba thymmai jong u phadar Sylvanus Sing Lyngdoh SDB bam kwai ha dwar u blei ha Parsih St, Joseph ha Laitkor da u bah Lambor Malngiang MLA jong katei ka jaka ha ka jingiadon lang ki phadar na seng kynhun niam Silesian.
Ha dien ba la plie ia u dur mot ba thymmai la kyrkhu kyrdoh da u phadar Paul Orphindro Lyngkot SDB ba dei u Provincial ka kynhun niam Salesians Province Shillong ha ka jingiadon lang ki riew rangbah jong ka balang.
Ha ka jingkren u Phadar Paul nongpeit jong ka kynhun Salesians la ong ba u Phadar sngi u dei u lyngdoh u ba don ia kata ka jingstad kaba kham kyrpang bad u tip bha ia ki bun tylli ki ktien jong kiwei ki jaidbynriew.
Ha ki sngi jong ka jinglong lyngdoh u la trei shitom ban pynphriang ia ka kam jong u blei, ym tang kata u long u ruh u nongpynkhiah lyngba ki jingduwai ki jong u bad ia kane la shakhi da ka jingwan jong ki briew na kylleng jong ka ri Khasi.
Ha kane ka jingialang paidbah ha phyllaw jong ka parish ha Laitkor ha kane ka sngi ban plie ia ka dur mot jong u Phadar Sngi la ong ba kum ka kyhun niam kan sdang ia ka jingpynkhreh ban kyntiew riewkhuid ia u Phadar Sylvanus Sing Lyngdoh kan sdang ha u snem ban wan 2022.
Ia u dur Mot jong phadar Sngi la plie ha kane ka juh ka jaka ha kine ki snem kiba la dep, hynrei mynta la kham pynbha shuh ia u dur mot bad kham pynbha shuh shuh ia ka jaka da ka jingshna ban pynbha ha kaba ki briew ki lah ban wan duwai ha khmat jong ka dur mot u Phadar Sngi hapoh katei ka Parsih.
Ha kane sngi kila don bun ki lyngdoh na ka kynhun jingiasylok niam Salesians, ki nongialam banglang ki nonghikai bad ki khynnah skul ka St, Joseph Secondary School ha kaba kila ai ia ki jingrai jong ki ban pynphuh ia kane ka sngi.
