Shillong, Nailar 14: Ka jingpynkhreh ban rakhe ia ka jinglait luid ka Ri India kaba 75 snem ha ka jylla baroh kawei ka jylla la dep ban pynbit pynbiang bad ha Nongbah Shillong u Mytnri Rangbah ka jylla u Conrad K Sangma un kyntiew ia ka lama Lairong jong ka Ri India ha madan Polo la shai ka sngi.
Ha kane ka jingleh burom u myntri rangbah ka jylla un sa shim ia ka jinglehburom ia ki kynhun shipai, ki pulit bad ki khynnah skul ki ban sa iaid kilan met ha katei ka jaka bad kan sa bud da ka jingkren na u myntri rangbah ha kane ka jaka.
Ia kane ka jingrakhe ia ka sngi laitluid jong ka Ri India mynta u snem 2022 kaban long la shai ka sngi ha nongbah Shillong ha ka madan kaba ar ha Polo yn sa pynipaidbah ia ka jingleh burom lyngba ki kabel TV bad ka Facebook jong ka DIPR ban ailad ia ki briew ban peit na ki iing ki sem.
Ha Tura ia ka lama Lairong jong ka Ri ynsa kyntiew da u Symbut myntri rangbah ka jylla u bah Prestone Tynsong, na ka liang ka sorkar kala dep ban bate ia ki mytnri sorkar, ki MLA ba kin kyntiew ia ka lama jong ka Ri la shai ka sngi katkum ba la dep an bthah.
