Shillong, Naitung 20: Mynta ka sngi ki nonghikai ki nonghikai SSA ga Garo Hills kila iaid paidbah ban leit sha ophis jong u Deputy Commissioner ban phah ia ka dorkhas sha u myntri rangbah ka jylla halor ka jingbym ioh tulop ka jong ki ia kaba la synran lang da ki nongialam jong ka TMC.
U President jong ka MSSASA u L G Momin, ha dien ba la dep ban ai ia ka dorkhas sha u DC ka West Garo Hills la ong ba kin ap na ka bynta 10 sngi lada kane ka jingap kan nym sei soh kin pynlong da ka jingiakhih kaba tyngeh.
Ha nongbah Shillong, ki nonghikai SSA kila pynlong ia ka jingiakhih shong kyllain mungor kaba khlem buh por ha jan Additional Secretariat ha kaba ki nonghikai kila shong ha katei ka jaka ban thiah ha surok ban dawa ia ka hok jong ki. Kane ka jingiakhih ki nonghikai kam dei ka sien kaba nyngkong.
Na ka liang jong ka TMC, kala kdew ba u president ka MSSASA u bah Aristotle Rymbai u la pynpsngew ba kim don lynti shuh da kumwei hynrei ki hap ban ia mih sha madan ban ia khih ban dawa ia ka tulop jong ki kaba la sah mynta la san bnai.
La kdew ba ki nongialam ka TMC u bah George B Lyngdoh u la leit ban ia kynduh ia ki nonghikai SSA ha Shillong ban sngap ia ka jingeh jong ki bad ha Tura mynta ka sngi la leit ban ai mynsien ia ka jingeh ki nonghikai SSA da u Richard M Marak ba dei peit iaka West Garo Hills District, u Adamkid Sangma, Rupert Sangma, MDC barim ka Tura bad u Safford N Sangma nongpeit ia ka West GH District.
Na ka liang jong ka TMC ka kynnoh ba kane ka sorkar ba don ar tylli ki engine kam shym la lah ban ai ka jingshari ia ki paidbah jong ka jylla Meghalaya, ki nonghikai kim shym la iohi ia kita ki sngi kiba bha kumba ki dei ban ioh bad kane ka dei ka jingshisha kaba la paw bad ka NPP bad ka BJP ki ia long kawei ban pyniaid ia ka jylla Meghalaya.
