Shillong, Nohprah 13: Ka iing bishar ba ha khliehduh jong ka Ri India ha ka jingshong bishar kaba la long ha ka 4th /12/ 2018, kala ai jingbit ban shallan ia u dewiong na kane ka jylla Meghalaya haduh 1,76,65,00 metric tons u dewiong haduh ha ka 31st Kyllalyngkot 2019.
Wat la ia ka hukum la ai naduh ka 4th /12/ 2018 hynrei haduh mynta ka sngi la shiphew sngi la iaid ka sorkar Meghalaya kam pat ai hukum ban sdang kit noh ia u dewiong bad haduh mynta ka sngi ka sorkar kam pat pynlait ia ki shallan dewiong sha ki trai dewiong kiba la kam ba ki dang don ia u dewiong ha ki jaka jong ki.
Haba kren ha u SP News Agency, u Bah M S Lyngdoh Director ka tnad Directorate Minerals Resources u la iathuh ba ka jingbym pat lah ban ai ia ki shallan ka long namar ba ki dang pynbeit mynta, ha dien ba ki la dep ban pynbeit kin sa ai noh sha ki trai shallan.
La ong ba na ka liang jong ka ophis ka kwah ban leh bniah khnang ba kan nym don ka jingbakla ha kaba ai ia ki shallan. Ka jingpynbeit ryntih la jan dep bad ki don ka jingkyrmen ba lehse ha ka sngi nyngkong ne sngi bar ar jong kane ka taiew ban wan kila lah ban ai ia ki shallan.
