Shillong, Kyllalyngkot 20: U Lat jong ka jylla Meghalaya u Ganga Prasad mynta ka sngi u la khaweh ia ka lama ban mareh na Mawsynram sha Umkhakoi sha Lawbah, ia kane ka jingiamareh la tip kum ka “Governor’s Cup Half-Marathon”. Ia kane ka jingiamareh la pynlong da ka ophis jong u Lat ka jylla ka Raj Bhavan.
Ha ka jingkren ba lyngkot jong u Lat ha jylla ha ka jingialumlang ha Mawsynram shuwa ban sdang ia kane ka jingiamareh u la ong ba kane ka Governor’s Cup Half-Marathon,ka long kaba nyngkong eh hapoh jong ka Ri India bad ka jingthmu jong kane ka long ban kyntiew ia ki kam ialehkai.
Nalor ki kam ialehkai ka jingthmu ka long ban kyntiew ruh iaki kam jngohkai pyrthei. Ha kaneka sngi la pynlong bun ki jingialehkai hapoh katei ka jaka Umkhakoi kaba hap hapoh ka jingpeit jong ka shnong Mawlongbna, kum ka khwai, ka jingiasiat khnam, ia kop rwai ruh.
