Ka jingtuh ba jar jar na ki nongwad kam: N.C. Sari

Sha ki wei ki jylla, ki sorkar ba pher ba pher ki la bun kam ban thaw bad ban wad bun ki lad ki lynti ban pynkhie im biang ia ka kamai ka jih jong ki nong bylla kaba la ktah jur ha kine ki sngi ba la dep naka daw jong u Covid-19. Hynrei phewse ka jylla Meghalaya ka la bunkam kylla ban thaw ki lad ki lynti ban kjit bad ban pyntyrkhong ia la ka pla ki nongshong shnong naduh ka khaii ka pateng, ka iaid ka ieng bad haduh ka koit ka khiah ruh kumjuh. Kaba ithamula bha ka long wat ia ki samla wad kam wad jam ruh kaba ha ka jingmut ki dei ki nongwad kam bad ki nongaikam ki dei ban siew lada ki ai kam. Ñiuma, ha ka jylla Meghalaya pat, lada wad kam, ka mut ba ki nongwadkam ki hap siew ia ki nongaikam shuwa ban pdiang ia ki nongwadkam. Kane ka pynpyrkhat ia u duk u suk, hato la u kot bor ne em ban siew ia ka dor ba la buh khamtam eh ia ki nongbylla ba trei mynsngi bad bam mynmiet.

Kane ka long halor ka khubor laitkam jong ka MPSC, kaba ha nga marwei ngam lah pei phang ban sngewthuh ba haduh katno ka jylla Meghalaya jong ngi ka riewspah eh tad haduh ba ki nong wad kam kin hap siew da ki spah ki spah tang na bynta ka wei ka bai aplikeshon phom. Bad lada ki nongthep kam kit hep bun tylli ki kam, khem pep kan ktah ia ka pla bai bam ki duk ki suk bad ka pynbor ia ki ban wad wat da ka ram. Ka jingrem ka bai phom ka long ruh kum ki dieng pynkiang ba khanglad ia ka jingthmu jong ki. Hooid, lehse lyngba ka jingsiew bai aplikeshon phom jong ki nongwad kam kan pynlong ia ki ban kham kheiñkor bad niewkor ia kaei kaba ki la pynlut bad kan pynlong ia ki ban trei shitom bad ia khun tyngeh ban pynurlong ia la ka jingthmu. Hynrei lada puson sani, ka jingbuh dor rem ia ki bai aplikeshon ha kum kane ka por hiran kam ka long pynban kum ka jingtuh ba jar jar na ki nongshong shnong khamtam ka jylla ba jyllei da ka jingkyrduk kam. Bad ruh ka pynioh phang ia ngi ban kren bad ban tharai sniew ia ki kam sha lyndet jong kane.

Kum ka nuksa, lada ngi shim ia ka jingkhein rit ba ki samla ba kyrduk bad kiba wad kam, ki la kot da ki lak phew ngut tang na bynta i wei ne ar tylli ki kam bad lada shi spah tyngka marwei na bynta ka wei ka kam, ka ioh lum bai phom ka ophis ka kot sha ki klur. Kane ka puson ha ka tyndong shkor jong ngi, ba sha pla jongno kan poi katei ka pisa? Hato ka pla jong ka MPSC ka long ka ba pei khamtam lada peit ia ka rukom pyllut ka MPSC ha ki eksam kam ba pher ba pher, ngam shym la iohi ba kan don jingpher eiei kum ha kaba buh ia ki CCTV camera la ha interview ne ha ka por ba thoh eksam, ne kin kino kiba kham iahap katkum ka jingioh.

Wat la katta ruh, kaba nyngkong hi kum ki nongwadkam ki kwah ban kylli shibun bah ki jingkylli kum, balei ka jylla ka la shim rem ia ka bai aplikeshon phom? Hato ka jylla Meghalaya ka dei ka jylla ki heh sai pan? Ne hato ka dei ka jingthmu ba rieh ki katno katne khnang ban khanglad ia ki duk ki lanot ban thep kam? Kumba ngi tip ba ka jylla Meghalaya ka dei ka Schedule area kaba mut ba bun ki Scheduled Tribe, bad kaba mut ruh ba ka ioh ka kot jong ki ST ka dang duna bha bad kumno ka sorkar ka pynkylla riewspah jubor ia ngi baroh. Shuh shuh lada shim ia ka jingianujor haba ki public sector jong ka sorkar kmie, naka bynta ki ST bad ban pynshlur ia ki ban thep kam ka sorkar kmie kam ju shim pisa wat shi tyngka ruh na ki, phewse ha jylla Meghalaya ka long da khongpong.

Shuh shuh kum ban lushia ia ka ophis MPSC ba ka rukom treikam jong ka, ka pynduh mynsiem ia shibun ki samla wad kam. Hooid, ngim dei than ban khmih lynti na kata ka kam sorkar bad ngi dei ban nang ban ieng ha la ki jong ki kjat, hynrei ka jingduna ki lad, ym banse ngi hap ban phai sha kum kine ki ophis sorkar kiba ka kam jong ki ka long ban khmih bniah ia ka jingduna bad ban pyndap ia ki jaka ba suda. Bad ka jingbymlah jong kane ka ophis ban khot aplikeshon, ka ktah ia ka lawei ki samla jong ka jylla. Ka jingdkhoh bad jingslem ha ka rukom pyniaid pynlong eksam, ka pynduh jingshaniah bad shah tharai sniew ha ka rukom thung kam. Ha teng ha teng, ka jingslem ban pyndap ia ki kam ba thylli ka pyndkhoh ruh ia ka rukom trei kam. Ka jingslem ban pynlong eksam kam ruh ka ktah ia ka lawei ba phyrnai ki khun samla wadkam bad bunsien kat ban pynlong eksam, ki samla ki la klet la kit hep ne em bad ka pyntharai ia ka rukom treikam kane ka ophis. Shuh shuh jingbym lah ban khot aplikeshon ba man u snem, ka pynkhang lad ia shibun ngut kiba la noh ka rta na ba ym iahap shuh bad ka kyrdan rta. Kane ka dei kawei kaba pynduh mynsiem ia shibun ki samla.

Ka jingkjit na la ki nongshong shnong kan ym wanrah ia ka bit ka biang hapoh ka jylla. Ban wanrah ia ka jingkylla, ia ka sur jong ki paidbah dei ban sngap.

Khublei Shibun

N.C. Sari

Mukhla Nongrim

Thadlaskein, WJH

What Next?

Recent Articles

Leave a Reply

Submit Comment

*