Shillong, Jymmang 19: Hadien ba ki Nongialam ka HNLC ki lah iakynduh bad u Bah Prestone Tynsong ka lah don ka jingiapynbeit ba iaka jingiakren ba pura kan sdang ha u bnai Jylliew kumba ka lah paw haki lad pathai khubor.
Naka liang ka HNLC ka kwah ban pynshai paidbah ba ka jingwan jong ka seng shakhmat ban iakren iasuk bad ka sorkar kam dei ka jingpyndemwait hynrei ka dei ka jingangnud ban iakren sngewthuh jingmut bad ban ia pynbeit halor ki jingeh ka sain hima sima jong ka jaidbynriew Hynńiewtrep.
Kam shym don kano kano ka jingioh jingmyntoi shimet hynrei ka dei na bynta ka jingiohnong jong ka Jaidbynriew hi baroh kawei. Ki dkhot ka HNLC lei ki lah duh lypa iaki kmie ki kpa,ki hynmen ki para,ki lok ki khun bad ngi lah duh lypa ym tang ka iing ka sem wat iala ka jong ka jingim hi ruh.
Kumba ka histori ka iathuh,ba haba ki dohlieh ki lah knieh iaka jingsynshar naki Syiem jongngi ngi lah kylla long kata ka Jaidbynriew ka bym don iaka ri lajong, Hadien ba ka sorkar phareng ka lah iehnoh iaka jingsynshar jong ka ha u snem 1947 ngi iai neh sah ha kata kajuh ka kyrdan haduh mynta mynne.
Ki don ki jaidbynriew kiba don laka jong ka ri(homeland)hynrei ki hap haka jingsynshar jong kiwei pat ki ri.Peit nuksa iaki ri kiba marjan kum ia Ka Tibet,Nagaland ki dei ki Jaidbynriew kiba lah pynbna ialade kum ki ri kiba laitluid hynrei haduh mynta kim long pat kiba laitluid, wat ki jews ruh shuwa u snem 1948 ki long ‘stateless’ tad haduh ba kin da ioh iaka jingithuh na kiwei pat ki ri ka pyrthei.
Ka jingshisha ka long ba lada phim ioh hi iaka jingithuh yn nym don ba burom iaphi. Kumta Ka Jaidbynriew jongngi ruh ka don ia la ka jong ka khana pateng haka sain hima sima.
Ka jingangnud bad ka thong jong ka HNLC kam dei iaka ‘separation’ lymne ia kata ka ‘integration’ hynrei ngi iengskhem ban ioh iaka ‘recognition’ ne kata ka jingithuh kum ka Jaidbynriew kampher da ka long hapoh ne shabar jong ka ri India.
Donkam iala ka jong ka iing kaba skhem kaba ngi lah ban kam ba ka dei ka iing bashisha jongngi kumba long ki Mizo, kiba don iaka Mizoram. Ka sorkar ka donkam ban weng iaki jingeh naduh tynrai donkam ka khyndew la ka jong namar ka khyndew ka dei ka tynrai jong ka jingim.
Haba ngi don iala ka jong ka khyndew ngi lah ban shna laka jong ka Sorkar bad ieng ialade kum ka jaidbynriew kaba laitluid. Halor ka khyndew ka shyiap lajong ngi lah ban seng iaki karkhana,ki kam ki jam,ngin bat hi iaka ioh ka kot bad ka synshar khadar halade hynrei lada ngim don tang shilyngkhot ka khyndew ka mut ngim doneiei.
Lah ban pyndonkam iaki marpoh khyndew,ki khlaw ki btap,ki um ki wah na bynta ba ngin im ialade. Haba ngi don laka jong ka khyndew ka shyiap ngi lah ban rep ban riang ban bsa ialade bad ban leh hi nalade,da kaba ngi leh kumne ngi kum ka jaidbynriew ngin lah kein ban weng iaki jingeh lajong haka jaka ba ngin ap iaka Sorkar India ba kan weng iaki jingeh jongngi.
Ki paid Garo ruh ki hap ban sngewthuh bha ia kane ka bynta bad maki ruh ki donkam noh jar laka jong ka khyndew bad ka iing, Ngim kwah ba Ki Achik bad ki Hynńiewtrep kin kylla long sa kiwei pat ki Jaidbynriew Kuki ne ki Rohingya lymne kum ki Kurds ki bym don laka jong ka khyndew lymne ki bym don laka jong ka ri hynrei ki dei ki jaidbynriew kiba shu bun tang u paid bad kiba hap ban shu phetwir pat ialade kylleng kylleng.
Ka HNLC ka kyrmen ia kaba bha tam na kane ka jingiakren hynrei ngim lah ban pyntikna ba haduh katno kane ka jingiakren ka lah ban iaid jngai lane kan long kaba jop namar kat haduh mynta mynne ka jingiakren iasuk kaba Jop ka dei tang ka Mizoram peace accord 1986 lada phi khein haka pyrthei baroh kawei.
Ha ka histori jong ka ri India lait nangta kiwei kiwei ki jingiateh soskular ki seng kiengatiar bad ka Sorkar India kim poi shano shano ki shu kut tang haki jingthoh bad ki jingkular jong ka Sorkar. Kane ka long katkum ka kyrwoh kaba la phah da u bah Sainkupar Nongtraw nongpathai khubor ka seng HNLC.
