Shillong, Naiwieng 08: Kum ka jylla naduh ki sengbhalang, ki political party , ki Myntri sorkar, ki ki District counc
il , ki Dorbar Trai Ri bad baroh ki trai muluk kila ia pyrshah bad pynpaw ba ngi kyntait ia ka Citizenship Amendment Bill ha ki snem kiba la dep .
Kaba sngewsih mynta ka long ba ka jingwan phai biang jong ka BJP ha ka bor synshar ha Delhi ki nongialam ka BJP mynta ki la kren shai ba kin wanrah biang ia Kane ka CAB ka ain kaban ailad ia ki rit paid na Bangladesh ban long ki nong India khampher wat la ki rung bad sah beain ha ka ri India khlem ki kot ki sla ba biang .
Ka jingthmu hi ka long ba ka BJP ka party ba Seng nongrim ia lade ha ka Niam Hindu ka kwah ba ki Hindu kin long ki heh paid ha baroh ki jylla ha North East India khnang ba kin synshar khlem kut ia kine ki jylla bad lehse ka long ban pynduh bor noh ia baroh ki trai muluk lane ban pynbor ia ki trai muluk ban long noh ki Hindu.
Hooid , ka BJP Mynta kalah ban ioh ia ki MP ban kyrshah ia ka CAB wat ha Rajya Sabha , lehse bun ngi sngew ba ngin nym lah eiei shuh bad la duh jingkyrmen noh. Hynrei Kum ka kynhun ka kyntu ia baroh ki trai muluk ba kim dei ban duh mynsiem, ym dei ban sngapjar noh bad ym dei ban shu hun noh ha ka rai donbor ki heh paid.
Ka COMSO ka khot ka wer biang sa shisien ia baroh ban ia tylli lang ban pyrshah ia ka CAB. La kyntu ia baroh ki political party ba phin ia tylli lang ban pyrshah khlem da ia kawang maw kawei ia ka wei bad lada long ka COMSO ka kyntu ia ki nongialam party ban ieh noh kito ki lama party mynta bad ban ieng Kum kawei ka jaidbynriew pyrshah ia ka CAB.
La kyrpad ia u Myntri Rangbah ka jylla ba Kumba u la ialam nakhmat ha ki por ba ladep Mynta ruh ba un bteng ia kata bad ki ai jingmut ia ki MP ka jylla ba phin Sngewbha ban treishitom ban iakhun pyrshah ia Kane ka jingthmu buitpoh ki heh paid.
Ka COMSO ka khot ngi wer ia baroh ki sengbhalang bad ki Dorbar Trai Ri naduh ki Dorbar shnong , ki Raid, ki Hima, Elaka , ki Dorbar Kur , ki Nokma bad kiwei ruh ba ngin ia treilang Mynta bad Kum ka jylla ka don kam ban pynpaw tang kawei ka sur bad kata ka long ba Ka Jylla Meghalaya ka pyrshah ia ka CAB. Kane ka long katkum ka kyrwoh kaba la phah da u Chairman ka COMSO u Bah Robjertjune Kharjahrin.
