Shillong Jylliew 14: Ka jylla Meghalaya ruh kan pyntrei kam ia ka “Ayushman Bharat National Health Protection Mission” ia kaba la tip ruh kum ka “Pradhan Mantri Rashtriya Swashthya Suraksha Mission” kane ka long da kaba pynkylla ia ka Megha Health Insurance Scheme sha ka National Health Insurance Scheme.
Ia kane la kren da u myntri ka koit ka khiah jong ka sorkar jylla Meghalaya u Bah A L Hek haka por ba pyniba kumno ka Ayushman Bharat National Health Minister’s Conclave kaba la long Vigyan Bhavan ha nongbah New Delhi mynta ka sngi.
Ia kane ka jingiamir jingmut la khot da u myntri ka koit ka khiah jong ka sorkar pdeng u J P Panda ha ka jingia don lang ki myntri ka koit ka khiah jongki jylla baroh jongka Ri India. Ha ka jingkren jong u Bah Hel u la ong ba ka jylla Meghalaya kala poi sha ka bynta kaba lai ha ka jingpyntrei kam ia ka MHIS naduh ba la sdang ia ka ha u snem 2012.
Kane ka skhim kala long kaba jop hapoh jong ka jylla Meghalaya ha kaba la lah ban pynrung haduh 4,36,788 lak tylli ki long iing bad ki paidbah kiba la ioh jingmyntoi ki long haduh 15,57,008 ngut bad ia kane ka skhim la ai ka jingithuh sha ki 201 tylli ki hospital ha ka Ri India baroh kawei.
La ong ba hapoh jong ka MHIS ka jingiarap iaki briew kiba pang ba shitom ka long tang T. 2,80,000/- tyngka hynrei ha kane ka National Health Protection Mission kajingiarap kan long haduh T. 5,00,000/- Tyngka. Kit num iing kiba la ithuh da ka sorkar pdeng ha ka Ri baroh kawei hapoh jong ka NHPM kan long 3,39,779 tylli kit num iing kabad ia kiba sah hap ban leh da ka sorkar jylla da kajuh ka jingmyntoi kumba ai ka sorkar pdeng.
U myntri ka koit ka khiah jong ka sorkar jylla u Bah Hel u la ong ha kane ka jingialang mynta ka sngi ba ka jylla Meghalaya kan pyntrei kam ia baroh solansar hapoh ka jylla ia kane ka skhim National Health Protection Mission khnang ba baroh ki long iing kiba hap hapoh jong ka MHIS kin ioh ia kane ka jingmyntoi jong ka Pradhan Mantri Swashthya Suraksha Mission ia kaba la tip kum ka National Health Protection Mission ba ki paidbah jong ka jylla Meghalaya kin ioh ia ki jingsumar ha baroh ki hospital ha ka Ri India.
Ha kane ka sngi ka sorkar Meghalaya kala ia soi ia ka MoU,ha kaba na ka sorkar jylla la soi da u Pravin Bakshi, Secretary ka tnad ka koit ka khiah jong ka sorkar jylla bad u Chief Executive Officer Megha Health Insurance Scheme ha ka jingiadon lang ryngkat u myntri ka koit ka khiah jong ka sorkar jylla u Bah AL Hek.
