Shillong, Iaiong 29: U Symbut myntri rangbah ka jylla u Bah Prestone Tynsong u la iathuh ba ka jingialang jong ka kabinet kaba la long mynta ka sngi kala pdiang ia ki 1,84,184 ngut ki ban ioh ia ka jingiarap jong ka sorkar kaba T.2100 tyngka, la phah sha ka tnad bylla ba kan pynlait noh ia kane ka pisa.
U Symbut myntri rangbah u la iathuh ba ka jingiarap kaba ki briew kin ioh katkum ki District ki long ba ka East Garo Hills kiba ioh ia kane ka jingiarap ki long 6315 ngut, East Khasi Hills District ki long 94177 ngut, West Jiantia Hills ki long 25547 ngut, Ri Bhoi ki long 10489 ngut.
South Garo Hills 3185 ngut, West Garo Hills 7562 ngut, West Khasi Hills 9475 ngut, North garo Hills 7546 ngut, East Jiantia Hills 11350 ngut, South West Khasi Hills 4640 ngut bad ha South West Garo Hills 2061 ngut.
U Bah Prestone u la ong ba kine kiba ioh ia kane ka jingiarap dei kito ki briew kiba khlem register bad ka sorkar, ki bym ioh ia u khaw ba duk bad kiba khlem ioh ia kano kano ka jingiarap la ka dei na ka sorkar pdeng ne na ki skhim jong ka sorkar jylla.
Haba ia dei bad ka khajana bad ki Petrol Pump ka sorkar kala ioh ia ka jingkyrpad na ki trai petrol pump ban pynjlan ia ka por ban siew namar ka jingwan lap noh kane ka jingpang COVID-19 ia kaba kila dei ban siew ha ka 31 tarik Lber.
Halor kane ka jingkyrpad jong ki trai Petrol Pump ka kabinet kala shim ia ka rai mynta ka sngi ban ai por ia ki trai petrol pump ba kin ai ia ka jingkheinb ad siew ia ka khajana ha lane shuwa ka 15 tarik bnai Jymmang 2020.
Ha kane ka jingialang jong ka Kabinet kaba la long mynta ka sngi la shim ia ka rai ban thung kontrak na ka bynta hynriew bnai ia u Bah Will Khyllep kum u Commisioner Secretary jong ka Law Department jong ka sorkar jylla.
U Bah Prestone u la iathuh ba u bah Will Khyllep u dei u Commissioner Secretary jong ka Law department u ba la shong thait na ka kam bad ha dien jong u la wan shimti u Bah S Kharlyngdoh, ha dien ka jingshong thiat jong u bah Kharlyngdoh kane ka kam kala long thylli.
La pynshai ba ka jingshim ia u bah Will Khyllep ban thung kontrak ia u ha kane ka kam ka long ba u la dei lypa u IAS bala shongthait bad u dei ruh u ba wan na ka kyrdan ba ia dei bad ka ain, kumta ka kabinet kala pdiang ban thung biang ia u kum ki Commissioner Secretary da ka kontrak na ka bynta 6 bnai, ha dien kata lada don ka kabinet kan sa shim biang ia ka rai.
