Shillong, Nailur 13: Ki pulit jong ka jylla Meghalaya kila iathuh ba mynta ka sngi ha ka por kumba 4.55 baje mynstep kila ioh ia ka jingtip ba ka kali ki pulit ka jylla kiba synran ia u myntri kam bor ding ka jylla u James P.K Sangma kala aksident ha Nagaon, Assam.
Na ka liang jong ki pulit mar ia ioh ia kane ka jingtip kila phah bak bak ia ki pulit na ka jylla sha katei ka jaka ba don ka jingaksident bad la shem ba ka kali ba shong ki pulit ban synran ia u myntri kala kylla bad ka kali ba shong u myntri ruh kala julor ha kane ka jingjia.
Ia ki saw ngut ki pulit jong ka jylla kiba la mynsaw ha kane ka jingaksident la pynkit sha Civil Hospital Nagaon ban ioh ia ka jingsumar bad ia u myntri la wan ialam noh sha Shillong ha iing sah jong u.
Ia ki kali kiba la julor, kaba dei ka kali pulit bad ia ka kali jong u myntri la buh ha Nonoi out-post jong ka jylla Assam ban leh ia kaba don kam katkum ka ain bad na ka liang jong ki pulit jong ki ar tylli ki jylla na Assam bad Meghalaya ki dang pynbeit ia kane.
