Shillong, Risaw 25: Kumba la dep ban pynbna da u Symbut Myntri Rangbah ka jylla u bah Prestone Tynsong ba ka sorkar kala rai ban thung ia ka “Expert Committee” ban thew ia ka Radiation ha Nangbah Jynrin bad halor kane ka rai ka sorkar mynta ka dang wat ia ki kynhun ban bymshed ia kane ka kam.
Katkum ki thymmei khubor, ki iathuh ba ka kam jong ka “Expert Committee” lane ka “Expert Agency” kaba ka sorkar kan thung bad ka kam jong ka committee kan long tang ban leit ban thew ia ka Radiation ha katei ka thain Nongbah Jynrin ban lap ia ka jingshisha la kadei shisha ne em kum ba la kynnoh.
Ki thymmei khubor ki iathuh ba ka sorkar ka dang wad mynta ia ki kynhun kiba tip ia kane ka kam ban leh bad kan ialeh katba lah ban ioh ia ki briew kiba dei ha kane ka kam Uranium ban lap ia ka jingshisha halor kata ka jingkynnoh ba ka Radiation kala kiew ha katei ka thain ba don ki top ba thep ia ki jaboh Uranium.
Kane ka rai jong ka sorkar ban thung ia ka “Expert Committee” lane kata ka ‘Expert Agency” ka long ha dien ba kala mih ka jingkynnoh da ki seng bhalang bad ki riew shimet ba kala don kata ka jinglait ka Radiation ha katei ka thain Nongbah Jynrin kaba hapoh jong ka South West Khasi Hills District.
