Shillong, Lber 10: Ka seng HSPDP kala pdiang ia ka shithi hiar shuki jong u president ka seng u bah Ardent M Basaiawmoit bad na ka liang jong ka seng shen kan sa khot ia ka jingialang ban ia kren ia kane ka kam.
Katkum ki thymmei khubor kiba ia jan bad ka seng HSPDP ki iathuh ba ki nongalam jong ka seng ki kwah ba ia kane ka kam president jong ka party HSPDP ka dei ban leit biang sha ki nongialam jong ka party na West Khasi Hills Distict.
Kumba ka long mynta ki don ar ngutki riew rangbah kiba la kham paw ia ka kyrteng hapoh jong ka party ban shim ia kane ka kam president, kita ki long u bah KP Pangniang MLA barim jong ka Rambrai Jyrngam bad u MLA barim jong ka pariong u bah Tuberlin Lyngdoh.
Na ka liang jong ka seng HSPDP ha dien ba kan jied thymmai ia u president ka seng kan lum kan liang biang ia baroh ki nongkyrshan jong ka party kiba la mih na ka seng ha kine ki snem kiba la leit noh baroh ba pynim biang ia ka seng, ong ki thymmei khubor.
