Shillong, Naiwieng 11: Seng MIPF mynta ka sngi kala leit ban ia kynduh ia u Bah Titosstarwell Chyne EM ba dei peit ia ka khyndew ka shyiap hapoh jong ka KHADC ban dawa ba ka KHADC ka dei ban pyntrei kam noh ia ka ain bat khyndew ban ioh ram shna iing ki paidbah na ki bank.
Ha dien ka jingiakynduh bad u EM ba dei peit ia ka tnad kam khyndew u Bah Kitboklang Lyngdoh Vice Presdient ka seng u la ong ba ka jingia kynduh jong ki ia u Bah Chyne mynta ka sngi ka long ban dawa na ka KHADC ban pyntrei kam noh ia ka ain bat khydnew na ka bynta ka jingmyntoi jong ki paidbah
Kumba ka long mynta lada ki paidbah ki don kam ram ban shna iing ki hap ban register bad ka sorkar ha ka dor kaba rem, lada ka JHADC ka lah ban leh kyrmen ba ka KHADC ruh kan pyntrei kam ia ka juh ka ain bat khydnew namar lada register bad ka District Council ka dor ka kham duna.
Namar kum ba ka long mynta ki bank ki pdiang ia ka ain bat khydnew jong ka JHADC ki, katba hangne ha KHADC kim pdiang ia kane kala buh ai ki paidbah ha ka jingeh kaba khraw namar ban register bad ka sorkar ka dor ka long kaba rem palat kiba bun kim kot bor.
Ha kane ka jingiakren na ka liang jong u Bah Titosstarwell u la pynpaw ia ka jingsngew kmen ka jong ban ioh ban ia kren ia kum kane ka kam kaba ktah ia ki paidbah u la ai ka jingkular ba la shai ka sngi yn khot ia ka jingialang ia ki ophisar ban ia kren ia kane ka kam.
U bah Lyngdoh u la ong ba namar bym don kane ka ain bat khydnew bun na ki jaka la shah knieh noh khamtam ha khappud bad ka jylla Assam, ki trai jaka lada ki kwah ban register ruh ka long kaba eh ia ki namar ka rem ka dor. Lada ka KHADC ka pyntrei kam ia kane ka ain bat khydnew ka dor kan kham duna ha kaba ki paidbah ruh kin lah ban register ia ki jaka jong ki.
