Shillong, Risaw 28: U Chief Executive Member jong ka KHADC u bah Titosstarwell Chyne haba jubab ia ka mat ia kren kaba la wanrah da u bah Banjop Pyngrope ha kaba ia dei bad ki Internet ha ki jaka ba hap hapoh jong ka KHADC, u la ong ba ka dei ka jingshisha ba ki mobile internet ka duna bha wat ha nongbah Shillong ym tang ha ki nongkyndong.
Haba ia dei bad kane ka kam na ka liang jong u CEM u la iathuh ba ha u snem ba la dep kala don ka jingiakren hynrei na ka liang jong ki kompeni ruh kila pynpaw ia la ki jong ki jingeh jong ki hynrei ki kompeni shimet kin leit tang ha ki jaka ba ki don ka jingiohnong.
U CEM u la ong ba kumba ka long mynta ki hap ban shaniah tang ha ka BSNL kaba dei jong ka sorkar pdeng, na ka liang jong ka KHADC kan pyrshang ban lum biang ia kine ban ia kren bad khamtam ia ki tower kiba la dep ban shna khynrei khlem pyntrei kam.
Haba wanrah ia kane ka mat ia kren u Bah Banjop u la ong ba dei ha kane ka jingkhang dam ba shem shisha ia ka jingdon kam ia ki Mobile bad ha kane kala paw shai ia ka jingdon kam ia ka internet bad bun na ki tower kiba don ha ka jylla kim shym la trei kam.
Kiwei kiba la ai lang ia kane ka jingkyrshan halor katei ka phang ki long u bah Gabriel Wahlang, Charles Marngar, Lamphrang Blah bah P N Syiem bad bah RV Lyngdoh.
