Shillong, Jymmang 23: Ka KHNAM ka pynremjur ia ka jingpyrshang jong ka sorkar pdeng ban pynkylla ia ka Citizenship Act 1955, kaba long ka jingpyrshang jong ka BJP ban wanrah iaka jingsngewniam ha ka ri India, kaba long pyrshah ia ka riti synshar jong ka ri India, la ongu Bah Thomas Pass President ka shnat seng samla jong ka KHNAM.
Ka Citizenship (Amendment) Bill 2016 ka long tang ka buit jong ka BJP ban pynpaw nam ia ka seng na ka bynta ki election, ka seng BJP ka la pynmih ia ka “Election Manifesto” jong ka ha u snem 2104 shwa ma MP election, bad ha kane ka Manifesto la don kijingthoh ba ka Ri India kan dei ka iingsah junom ia baroh ki paid Hindu kiba don sha kiwei kiri ruh, kaba mut ruh baki wei ki jait niam kim don hok ban long trai ha Ri India.
Ka jinglong trai Ri lane Trai Jylla ka long kaba kongsan haduh katta katta khamtam ia ki jaitbynriew rit paid bad lada ka sorkar pdeng ka leh donbor ban wan rah ia kane ka ain, kan long ka jingma kaba khraw ka ban ap ia ki jait bynriew kiba long tang shisym boh um ha khmat ka duriaw bah.
Ka seng ka ai jingkyrshan ia kano kano ka jingiakhih pyrshah ia kane ka jingthmu ban wanrah ia kane ka amendment bill, bad ki political parties bad baroh ki seng ha kylleng ka jylla ngim dei ban shuhun ban shu peit kai haba kiwei ki iakhih naka bynta ka jingmyntoi jong baroh lang.
Shwaba ka jingma kan wan baroh ki nongshong shnong jong ka jylla Meghalaya na duh ki political parties, ki seng bhalang, ki nongbylla, ki nongtrei sorkar, salonsar dei ban pynrem ym ha barieh, hynrei haba paw ban khanglad ia kane ka jingthmu jong ka sorkar pdeng.
