Shillong, Iaiong 11: Ka Khasi Students’Union, ka pynpaw ia ka jingsngewsih ha
lor ka jingshah leh donbor jong ki nongialam ka NEHUSU ha ki bor pyniaid jong ka NEHU Tura Campus ha ka 7 bad 8 tarik jong u Ïaiong 2019 ha sor Tura. Ki nongialam ka seng hadien bad ki la dep ia kynduh bad ki nongialam ka NEHUSU ki la ioh ki jingujor kiba har rukom kiba ym lah ban pdiang bad kiba poi shaduh u pud ba ktah ia ka rain ka rem jong ki kynthei briew.
Ka seng ka sngew ba ka dei ka kamram jong ki bor pyniaid ka NEHU Tura Campus ban pynbit pynbiang ha ka liang ka shong ka sah ia ki dkhot ka NEHUSU haba ki wan ban jngoh ia kane ka campus bad ban ia syllok na ka bynta ka bha ka miat jong baroh ki samla pule kane ka skul bah.
Ka KSU ka pynrem jur ia u Pro VC ka NEHU Tura Campus uba la leh ki kam ibein ia kine ki nongialam ka NEHUSU da kaba u kyntait ban ia kynduh ia ki bad ka kren bein kren khoh ia ki kaba ka seng ka sngew ba u lah ban thew ia ka Jaidbynriew. Halor kane ka seng ka maham ia baroh kiba don ha Meghalaya kynthup ruh ia u Pro VC ka NEHU Tura Campus ba lada ka don shisha ka jingkren bein ia ka Jaidbynriew Khasi ka mut ka seng kan ym shong kli kti hynrei ka pynher krad ia ki nabar ka jylla.
Shuh shuh ka seng ka pynrem jur ruh ia ki briew kiba don kti ban kren kynshlein ia ki dkhot kynthei ka NEHUSU bad ka dawa na ki bor NEHU ba ki dei ban pynshitom mardor ia ki. Ka KSU ka pynrem jur ruh ia ka jingleh donbor u Proctor ha kaba u la byrngem byrsit ia ki nongialam ka NEHUSU bad don kti ruh ha ka ban knieh jubor ia ki Identity Cards ki jong ki.
Shuh shuh ka seng ka pynrem ia ka jingbthah jubor une u proctor ba ki dei ban mih noh shiteng miet baroh ki dkhot ki NEHUSU hynrei u kyntu tang ia ka President ba ka dei ban sah marwei ha University Guest House.
Kine ki jingjia baroh ki pynpaw ia ka jingleh donbor u Pro VC lem bad ki kynhun ki jong u ia ki samla nongialam ka NEHUSU bad ki pyni ba une u briew um don jingkitkhlieh ia ka bha ka miat ki samla pule lane ban kyntiew ia ka NEHU hynrei u shu don ha kane ka skul bah tang na ka bynta ka jingmyntoi ka jong u ne jong uno uno re.
Khatduh khatwai katkum ka jingtip jong ka seng ka la don ka jingiaujor ejahar mar kylliang hapdeng ka kynhun u Pro VC ka Tura Campus bad ki nongialam ka NEHUSU kaba long ka jingjah burom ia kane ka skul bah ba pawnam ka jylla. Kumta ka seng ka kyntu ia ki bor pyniaid ka NEHU Permanent Campus ba ki sngewbha ban tuklar lem ia kane ka thma pohiing khnang ba yn lah ban pynbeit hapoh iing bad ban ia poi noh sha ka jingsngewthuh jingmut.
Ka seng ka la kyntu ruh ia baroh ar liang mamla ba lada lah ban shu ia pynbeit hapoh iing kata hapoh u pud u sam ka NEHU kan bha shibun ba kin weng noh ia ki ejahar ba ki la buh ha thanad. Kyntang iawai ka seng ka ai ia ka jingkyrshan ba pura ia ka NEHUSU halor kane ka jingjia bad ka long kaba kloi wat haduh u pud ba kan hap ban mih sha khmat ban tuklar ia kane ka kam. La ong u samla Donald V Thabah General Secretary ka seng KSU ha ka kyrwoh kaba la phah mynta ka sngi.
