Shillong, Nohprah 07: Ka Khasi Students’ Union (KSU) kan kynmaw burom ia ka lyngkhuh sngi iap ba 24 jong u Bah Bull N. Lyngdoh (President, KSU 1984 – 1989) kaba dei ha ka 07 tarik u Nohprah 2018 da kaba pynlong ia ka jingialang ha khmat u mot dur jong une u nongialam ba radbah ha Malki hajan Shillong Law College.
Ha kane ka jingialang kan don ruh ka jungbuh syntiew da ki tnad treikam kiba pher ba pher ka KSU. Kane ka jingialang kan sdang ha ka por 9 baje mynstep bad kumta la kyrpad ia baroh ki dkhot jong ka seng ba ia poi ryntih ha katei ka sngi ha katei ka jaka ha ka por ba la buh ban ia pyni lang ia ka dak burom ia une u riewkhraw uba la len lade na ka bynta ka dawbah ka Jaidbynriew.
Lyngba kane ka kyrwoh ka KSU ka iawer bad khot sngewbha ia baroh ki dkhot ka seng kiba la shongthait naduh ka por ba la seng ia ka bad kiba dang shu shongthait shen. Ka seng ka kyrpad rit ia dkhot bad nongialam barim ba kin wan ia shim bynta lem ha katei ka sngi kum ka dak ruh ban rakhe ia ka lyngkhuh snem kaba 40 jong ka seng.
Shuh shuh, ka KSU Malki Circle kum ka dak pynsah kynmaw ia une u khlawait uba dei u nongshong shnong ka Malki ka la pyniaid ia ka 8th B. N. Lyngdoh Memorial Open to All Football Tournament ka ban sa pynhap pyrda noh ha katei ka sngi hi kata 07 tarik u Nohprah 2018 ha ka por 12 baje mynsngi ha madan Malki.
Katei ka sngi kan sakhi ruh ia ka jingiaknieh ia ka nam lahduh jong ka tournament ha kaba ki nongiakhun ha katei ka phainal kin long ka Khasi Students’ Union Jaintia Hills District Unit bad ka Ksan Rngiew FC. Kumta la iawer ia baroh ba kin wan ia sakhi lem ia katei ka jingialehkai football.Ka KSU kan leit buh syntiew ruh ha u mot lumjingtep u Bah Bull N. Lyngdoh ha Malki.
