Shillong, Kyllalyngkot 18: Ka KSU South West Khasi Hills District ka kwah ban kren shai sha ka sorkar ba ngin nym lah ban ong ” hooid ” ia kaba dei ban ong “Em” halor ka surok Two Lane na Nongstoin – Wahkaji – Ranikor. Kumba ka jingthmu jong kane ka surok ka long ban tih ia u marpoh khyndew uranium napoh ka thain kumta ka seng kan iai ieng ha kajuh ka nongrim ban pyrshah watla kan long kumno kumno ruh.
Ka KSU ka sngewthuh iaka jingleh buit tuh jong ka sorkar tangban pynbiej ia u paitbah da kaba ka shu kam ba ka sorkar da kaba ong ba kam don jingiadei shuh bad ka kam tin uranium hynrei ka seng ka tip shai ba kine kiei kiei ki dei tang ki kam buit tuh ban buhrieh iaki jingshisha khnang ba yn lah ban pynbiej ia u paitbah haka kyrteng jongka roi ka par.
Ka seng KSU ka kynnoh ba ka jingshisha halor ka jingshukor jong ka sorkar ka long ba haduh mynta kam pat shym la don ka rai hapoh ka House jong ka State Legislative Assembly halor u uranium . Ym tang katta, ka jingpynbiej jongka sorkar India ryngkat ka jingthmu ba rieh jong ka ban pyniaid shakhmat ia kane ka jingshna ia kane ka surok two lane ha katei ka thain ka la paw shai lyngba ka jingbym mon jongka Sorkar ban weng noh iaka Environmental Clearance ban khlong uranium hapoh Domiasiat bad Mawthabah ia kaba la ai da ka Ministry of Environment, Forests and Climate Change ha u bnai December jong u snem 2007.
Ka seng kumba ka la rai nyngkong ban pyrshah ia kane ka surok uranium kan ieng ha ka juh ka nongrim ba kan iai pyrshah namar ki sngewthuh shai ba kumba nyngkong ka la paw ba ka dei ka pre – uranium mining activity mynta ruh kan thew hi sha kata ka bynta hynrei ka shu long ba ka sorkar India ka pyrshang ban buhrieh ne tap eitmiaw noh iaki jingshisha bad ong ba kam kwah ban tih uranium tang ba yn lah ban pynkohnguh iaki paitbah ka thain ba kin shah sngewbha ban iaid shakhmat ia kane ka surok.
Ka seng ka pynrem jur ruh iaka sorkar halor ka jingbymlah ban wanrah iaka roi ka par ba khuid ba suba hapoh katei ka thain da kaba ong ruh ba kane ka dei ka jingleh khnang jongka sorkar khnang ban pynsaja iaki briew katei ka thain ba kin shah ban wanrah iaki pre – uranium mining projects bad ruh ban shah tih uranium hapoh ka thain. Ka KSU kum ka seng ka sngewthuh ba ka sorkar ka la khohreh palat ban iaid shakhmat ia kane ka surok uranium namar wat lada kam pat biang ka surok ruh hynrei ka la pyrshang ban wan tih tuh lyngba ka jingphah iaka AMD ban wan drill uranium ha katei ka thain kumba ka la jia ha u snem 2018 ha kaba ka la wanrah ruh iaka jingkulmar hapoh jongka District baroh kawei.
Ka KSU South West Khasi Hills District bad ka KSU Umdohlun Circle kan pynlong iaka jingshong kyllain mungor haka 23 tarik mynta u bnai naduh ka por 10am ha Mawkyrwat hajan ophis DC South West Khasi Hills District kum shibynta ban pyrshah iaka Public Hearing ba yn pynlong da ki bor District bad ka tnad PWD ( Roads) ha ka 29.01.2019 ha Mawpat Umdohlun.
Ka seng ka pynrem jur ia kane ka jingthmu jong ka sorkar ban iaid shakhmat iaka Public Hearing namar kumba kane ka project ka don ka jingiadei bad u uranium. Ka seng ka kynthoh jur ruh iaka sorkar halor kane ka jingpyrshang ban ialam bakla iaki paitbah jong ka thain da kaba ki sngew ruh ba kane ka dei ka jingkhein dewthala iaka Public hearing ba la pynlong ha Nongbah Jynrin haka 12.june 2007 ha kaba ha kitei ki por ki paitbah ki la shim daka rai ban pyrshah ia u uranium bad iaki development kiba wan ryngkat ki jingthmu ban tih uranium.
Ka seng ka kyntu ruh iaki paitbah ba kim dei ban shah ialam bakla ha kaba kum kane ka por watla hapdeng bun ki jingshah pynbiej namar lada ki bakla ban shim rai mynta kan long ka ba sngewsih ruh na ka bynta ka pateng ban wan. Ka seng ka kyntu iaki paitbah jong ka thain ba ki dei ban sngewthuh ba kiba kum kine kijuh ki jingshah pynbiej haki buit phon jongka sorkar kwah tih uranium ki la jia ruh ha Jaduguda haki snem ba la leit da kaba pynbiej ia u paitbah haka kyrteng jongka roi ka par. Kane ka long katkum ka kyrwoh kaba la phah da u samla Dusterwell K. Lyngdoh, Organising Secretary KSU South West Khasi Hills District bad uba dei ruh u President jong ka KSU Umdohlun Circle
