Shillong, Naiwieng 25: Na ka liang jong ka kynhun hapoh ka lama ka “Save Hynniewtrep Mission” kum ka dak ban pynpaw ia ka jingpyrshah bad pynrem halor ka jingjia ha Mukroh, kin pynlong da ka jingthang tyngshop jong u Conrad Sangma, CM ka Meghalaya, Himanta Biswa Sarma, CM ka Assam bad u Amit Shah, Myntri Kam Pohing Sorkar India, ha Sor Shillong lashai ka sngi ka 26.11.22 ha ka por 2baje nohphai sngi.
Ki mat jingdawa jong ki kum ka kynhun ki long ba ka Sorkar Meghalaya ka dei ban dawa ban kem mardor ia ki pulit bad ki Forest Guards kiba donkti ha ka ban siat iap ia ki paradoh parasnam bad ia ka mukotduma bad ka jingbishar dei ban leh hapoh ki Ing Kashari jong ka Jylla Meghalaya ym sha Assam.
La ong ba kim dei ban shu hun tang ba ka Sorkar India ka pdiang ia kata ka jingdawa jingtohkit da ka CBI hynrei ki kam ba iadei bad kane ka jingjia baroh dei ban leh hapoh ka Jylla Meghalaya. Ka Kynhun ka dawa ruh ba ka Sorkar Meghalaya ka dei ban pynkiew ia ka song pisa jingiarap ia ki longing kiba lah mad ia kane ka jingjia ba sngewsih.
Ka kynhun khot ka wer ia ki paradoh parasnam ka Jaidbynriew ba phin ia wan snoh kti lang bad ngi kum ka kynhun Sha kane ka Prokram kum ka dak ka jingpynrem ia katei ka jingjia bad ban kyntu ia u Conrad Sangma, u Himanta Biswa Sharma bad u Amit Shah ba ki dei ban shim ia ka jingkitkhlieh.
Ka kynhun ka ong ba kine baroh kin nym jia Lymda dei ba kine ki bor Sorkar ki shim sting bad Leh kamkai halor ka mat jingia kajia pud hapdeng ka Jylla Meghalaya bad Assam, kane ka long katkum ka kyrowh kaba la phah da u bah Roy Kupar Synrem General Secretary HYC.
