Shillong, Nailar 12: Ka kyrwo
h kaba shai sha ka sorkar , ka long ba ka KSU Byrnihat circle kan iai pyrshah ia ka lynti rel lada dei ban iaid da Kano kano ka lynti ruh. Kane ka mat lynti rel kam dei ka mat ba thymmai hynrei naduh ki por ba la leit noh.
Kum ka seng kala kren bad ki la pyni ka jingeh naduh ka por ba la ialam da u Nongialam ba Rangbah ka KSU ha ki snem ba mynshwa, Bah Bull Nangjop Lyngdoh bam kwai ha dwar u Blei bad haduh mynta kum ka seng ki dang ieng skhem triang ban pyrshah.
“Ngi donkam ia ki aiñ iada ri , ha kaba Kum ka jaitbynriew ka angnud bad ap khmih lynti na ka kti ki Nongthaw aiñ kiba shong ha sectariat ban pynurlong ia kita ki Aiñ kiba skhem kiba khlaiñ. Ka sorkar jylla ka la pass daka resolution ban dawa ILP , pynurlong shwa iakata sa ia kren kata ka lynti rel hadien, namar ngi donkam kyrkieh ia ki Aiñ ban iada ym iaka lynti rel”. La ong u samla Wanphrang Mawthoh President KSU Byrnihat Circle.
Hapdeng ka jingjur ban saphriang ka khlam Covid-19, hynrei ka sorkar pdeng ka la wanrah bad pynkhih ia ka jingmut jing pyrkhat ia ki nongshong shnong ha ka Ri lyngba ka draft Environment Impact Assessment 2020, ki la wanrah ia ka National Education Policy bad ka la pyrshang ban bsuh tuh ruh ia ka jingkwah jong ka, ban wanrah kloi noh ia ka lynti rel ,kaba pyrshang ban teh ban khum lyngba ki kyndon Covid-19 khnang ba ki paidbah kin nym lait ban khih ban ksar.
Ka KSU kam salia lada ka sorkar ka pyrshang ban teh ban khum lyngba ki ain sorkar wat ha kane ba ka por ba ka Khlam ka dang jur namar ka khubor kaba shai ngim kwah ba ka Jaidbynriew kan shah teh tyllai phasi lyngba ka lynti rel .Ka nuksa ba rit ha kane ka por ba mynta mano ba wanrah ia u ta u Virus influx lada ym dei kita ki BSF.
Ki samla ka Jaidbynriew ki la tyrha bad dukha mynsiem ha ki snem 2017 namar ka jingthombor jubor jong ka sorkar ha kaba bun ki Samla ki la rung along haba ki pyrshang ban kren iaka hok bad ka jingshisha naka bynta ban iada ia ka Jaidbynriew.
Ki langiong bad ki ingkhong shyllangmat ki pyrshang ban die tad dor ia la ka Jaidbynriew ha ka kyrteng ka roi ka par bad ka ioh kam ioh jam bad kane ka pyni ba ka sorkar pdeng ka pyrshang shuh shuh ban bsuh ia ki kam buit tuh jong ka lyngba jong ki.
ka sorka jylla kam dei ban rieh tngen ha ka syrngiew jong ka lynti,halor ki kam pynroi bad kiwei dei ki kam, ne ban rieh tngen haka jing pynsuk ha ka leit ka wan ne ka kit ka bah namar ngim lah ban iapeiñ iaka lawei jong ka jaitbynriew, “Don kama haba lathan ka suk”.
Ka jingiakhih kam pat kut bad ka Seng KSU kan nym pat shongkli kti lada ka sorkar ka pyrshang ban thombor jubor ia ngi na baroh ki liang la ong u samla Wanphrang Mawthoh President ka KSU Byrnihat Circle ha ka kyrwoh mynta ka sngi.
