New Delhi, Kyllalyngkot 07: U Myntri Sorkar Pdeng ba dei khmih ia ka tnat Youth Affairs and Sports, u Anurag Singh Thakur u la plié paidbah ia ki phang jong kaY20 summit, logo bad website ha ka prokram shuwa ka Y20 Summit India mynta ka sngi ha New Delhi.
Ka Secretary jong ka tnat Youth Affairs, Sorkar India, ka Meeta R. Lochan, Dr Vijay Chauthaiwale, Mentor, Y20 Secretariat, India, AnmolSovit, Chair na ka bynta ka Youth 20 Engagement Group bad ki ophisar jong ka tnat ki la iadon lang ha kane ka prokram.
Ka Y20 summit kan long ha India ha ka sien kaba nyngkong. La pynlong ruh ia ka Panel Discussion halor ka phang “How India can harness its youth population to be a superpower” ha ka bynta kaba ar jong ka prokram mynta ka sngi.
Ha ka jingai jingkren jong u, u Anurag Singh Thakur u la ong, “Ka G20 Summit ha India kan wanrah lang 43 ngut ki khliehduh jong ki Delegation – kaba heh tam ha ka G20 ki ban iashim bynta ha ka Summit kaba khatduh ha New Delhi ha u Nailur mynta u snem.
Ka G20 ka don ar tylli ki lynti ne ki track: ka Finance Track bad ka Sherpa Track. Ka Sherpa Track ka peit ia ki jingai jingmut na ki 13 tylli ki Working Group, 2 tylli ki Initiative – Research Innovation Initiative Gathering (RIIG) bad G20 Empower, bad ki Engagement Group bapher bapher.
Ki Engagement Group ha kaba ka Youth 20 lane ka Y20 ka long shi bynta, ka wanrah lang ia ki kynhun ha ka imlang sahlang, ki MP, ki kynhun pyrkhat, ki longkmie, ki samla, ki nongbylla, ki business bad ki nongwad bniah jong ki ri G20.”
U Thakur u la ong, “Ka lawei jong ka ioh ka kot ka pyrthei bad ka jinglong briew ka shong ha ka kti jong ki Gen Z, ki samla mynta ki dei kiba kha ha ka pyrthei digital, kaba don jingiadei bad man ki ri bad kaba dang kylla man ka por hapdeng ki jingartatien.
Ka jingstet, ki lad kiba bun! Ki samla ki dei kiba don bynta ha ka mynta bad ki nongteiia ka lawei. Ngi la iaidshaphrang ha ki kam da ka jingngeit ha ka AtmaNirbhar Bharat bad Ek Bharat Shreshtha Bharat. Ka dang don ka jingkylla ha kaba iadei bad ki start-up ha ka ri. Ka long kaba donkam ban kynmaw ba ki samla kin ioh ia ka lawei ba ki tei”.
Da kaba batai kham bniah, u Myntri u la ong, Ka Y20 Summit ka dei ka lad kaba kyrpang ia ki samla ba kin ai jingmut halor ki polisi bad ban pyndonkam ia kane ka rynsan ban ai ki jingsngew jong ki sha ka pyrthei.
Ka Youth 20 India Summit ka wanrah ia ki nongsumar ia ka lawei na kylleng ka pyrthei na ki ri G20 ba kin iamir jingmut, iakren bad thaw ia ki jingpynbeit ha kaba iadei bad ka roi ka par ha ka imlang sahlang.
Ha ka Y20 Summit, ka India kan ym shu kren, hynrei kan pynbiang ka rynsan ia ki samla na kylleng ka pyrthei ha ka Y20 Summit ban iohsngew ia ki ha ka SynsharPaidbah kaba heh tam hapdeng ki nongialam ba dang samla kiba bat ia ka lawei ha ka kti jong ki.
U Anurag Thakur u la kren ruh shaphang ki phang jong ka Y20 kiba long i) Future of Work: Industry 4.0, Innovation & 21st Century skills, ii) Climate Change and Disaster Risk Reduction: Making Sustainability a way of life, iii) Peacebuilding and Reconciliation:
Ushering in an era of No War, iv) Shared Future: Youth in Democracy and Governance and Health, Wellbeing &Sports: Agenda for Youth. Kine ki kam kiba kongsan jong ka Y20 Summit ki kdew sha ka jingkyrkiehia ka pyrthei ba kan sngewthuh ia ki jingshisha jong ki por kiba dang kylla ha ka jingialeh jong ngi ban im, la ong u Myntri.
U Thakur u la ong shuh shuh, “Kane ka summit ka ai ia ka lad kaba biang bha ia ki samla bad ka pyrthei ban tei ia ka rukom ba ngi jam shakhmat. Nga kyrmen ba phin pyndonkam ia ka lad Y20 ban hikai ia ngi bad shimti ia ka jingbahkhlieh ban pynthikna ba ka declaration ba phi wanrah sha ki nongialam G20 ka dei kaba pynurlong ia ki jingangnud jong baroh ki samla ha ki jaka nongkyndong bad ki jaka sor, ha ki ri ba dang kiew bad ki ri kiba la kiew.
Ka Youth 20 ka dei ka rukom kaba biang bha ban pynsawa ia ka sur jong kine ki samla. Ka pyrthei kansngap shah shkor bha ia phi.Nga ngeit ba phi dei ki nongsumar jong ka lawei ki ban pynthikna ia ka shongsukshongsain, ka jingryntih kyrdan hapdeng ki shynrang bad kynthei, pynduna ia ka jingkylla ka mariang, pynheh ia ka jingiar ki deiriti, saindur thymmai da ka jingngeit kaba skhem bad ioh jingkoit katba phi dang kiewshaphrang.”
U Thakur u la ong ba ki samla ki dei ki AGENT ia ka jingkylla ba ka pyrthei ka donkam, ha kaba ka A ka mut: Advocate na ka bynta ka kam ba ki ngeit, ka G ka mut: Go-green bad pdiang ia ka rukom im kaba lah ban iaineh, ka E ka mut: Equality bad ka jingpdiang ia baroh Pynthikna ba ki jaka ba phi don ki long kiba iar.
Kiba pdiang ia ki rta bapher bapher, N ka mut: Nurture ia ka jingkoit ka met bad ka jingmut jingpyrkhat, ka T ka mut: Tech-Innovation – Pyndonkam ia ka teknoloji na ka bynta ka bha ka miat ka imlang sahlang bad ka jingbha jong ka jinglong briew ban kyntiew ia ka jingseng kam lajong.
Ha ka jingai jingkren ha kane ka prokram, ka Secretary Youth Affairs, ka Meeta R. Lochan ka la ong ba ki kam ki ban shim da ka Y20 ha ka por jong ka presidency jong ngi kin peit ia ka jinglong nongialam ki samla ha ka pyrthei bad ka jingiatreilang.
Ha kine ki 8 bnai ban wan kin don ki Pre summit halor ki san tylli ki phang ha ryngkat ki jingiamir jingmut bad ki seminar ha ki skulbah ha kylleng ki jylla ka India shuwa ban long ka Youth-20 Summit.
Na ka bynta ka India, ka G20 Presidency ka long ruh ka dak jong ka jingsdang ka “Amritkaal”, ka samoi kaba 25 snem kaba sdang naduh ka jingdap 75 snem ka jingioh jinglaitluid ka ri ha ka 15 tarik u Nailar 2022, kaba ialam sha ka centenary jong ka jingioh jinglaitluid.
Na ka ka bynta ka imlang sahlang kaba katkum ka juk mynta, kaba riewspah bad kaba pdiang lang ia baroh, kaba paw na ki rukom trei kiba peit shuwa ia ka jingbha jong ki briew. Ka India ka don ka bynta kaba heh ha ka jingwad ia ki jingpynbeit ia ki jingeh jong ka pyrthei ban pynthikna ia ka jingbha kaba pura ha ka jingngeit ha ka VasudhaivaKutumbakam.
