New Delhi, Rymphang 08: U Vice President jong ka India, U M. Venkaiah Naidu u la ong ba ka lawei jong ka Ri India ka shnong ha ki samla jong ka Ri, ia kane u la ong ha kaba kren ha ka jingialang jong ka “National Conference on Jobs & Livelihood Creation – Critical Growth Enablers”,ia kaba la pynlong da ka NITI Aayog bad ka CII, ha nongbah Delhi mynta ka sngi. U myntri jong ka sorkar pdeng ba dei peit ia ki kam pynroi sha ki nongkyndong u Narendra Singh Tomar, u Myntri khynnah ba dei peit ia ka Micro, Small bad Medium Enterprises, u Giriraj Singh, u CEO jong ka NITI Aayog, u Amitabh Kant kila ia don lang ha kane ka sngi.
Ha ka jingkren jong u Vice President, u la ong ba ka long kaba don kam ban plie kilad ki lynti kumno ban ioh ia ka sap ka phong jong ki samla, u la ong kaba don kam ka long ba dei ban don ia ki jaka hikai kiba biang ki ban ia hap dur bad ki kam karkhana, ka jingsngewnghian bad ka koit ka khiah kine ki long kiba don kam ha ka ioh kam ioh jam yn tang hapoh la ka jong ka Ri hynrei ha ka pyrthei ruh kum juh.
Na ka liang jong u Vice President , u la ong ba ka jingnang jingstad ka long kaba don kam haduh katta katta ban ai bor ia ki briew ha ka ioh ka kot, ha ka imlang sah lang, ha ka sain pyrthei bad ha ka riti dustur, dei na kane ka daw ba ka jingnang jignstad ka long kaba don kam haduh katta katta.
Ban plie ka lad la lynti ia ki khun samla don kam ban hikai ia ki khang ba kin long kiba la khreh ha kaba ki lah ban trei ia ki kam katkum ka jingdon kam, dei ban hikai ruh ba kin long ki nongseng kam seng jam, ki karkhana ki dei ban wan sha khmat ban ai jinghikai ia ki khun samla bad ba kin long ki nongpynmih kam pynmih jam.
U Vice president u la ong ba ka jingkyrduh kam kyrduh jam ka dei ka jingeh ia baroh ki paidbah nongshnong shnong. U kyntu ia ki paidbah ba kin pyntrei kam ia ki skhim jong ka sorkar na ka bynta ban long ki lad ai kam ai jam ia ki briew. Ban kyntiew ia ka long briew man briew ha ka ioh kam ioh jam don kam ia ki riew shimet ban kin bei tyngka ha ka seng kam seng jam bad lada shim kabu ia kine baroh kan wan rah ia ka jingkylla kaba khraw.
