Shillong, Naiwieng 20: Ia ka jing
rakhe jong ka jingdap 10 snem jong ka Science College ha Mairang kaba la pyniaid da ka Balang Presbyterian la pynhap pyrdan mynta ka sngi ha kaba u bah Vincent H Pala MP jong ka Shillong u la ong u kongsan ha kane ka sngi.
Ha ka jingkren jong u Bah Pala ha kane ka sngi u la ong ba ka long kaba don kam ban pynshlur ia ka jingpule ha ka saian. Ka jingseng ia kane ka jaka pule ka dei na ka jingiohi jngai jong ki nongseng ia ka jingdon kam ia kum kane ka jaka pule ha ki nongkyndong.
Haba ia dei bad ka jingnang jingstad u la ong ba ki samla pule kim dei ban pynkut ia ka jingstad jong ki tang hapoh jong ka Mairang, hynrei ki dei ban pynphriang sha baroh akwei ka jylla bad kum juh ha ka Ri baroh kawei
Lah ban kdew ba ia ka Mariang Science College la sdang ha u snem 2006 bad kane ka dei ka science college kaba nyngkong hapoh jong ka West Khasi Hills District ia kaba la ioh ia ka jingithuh na ka skul bah jong ka NEHU bad ia ka Higher Secondary la ioh ia ka jingithuh na ka MBOSE. Ka jingthmu haba seng ia kane ka College ka long ban plie lad ia kiba duk ba kin ioh ban pule ia kane ka kyrdan pule.
Ha kane ka sngi la don ka jingialehkai na ki khynnah skul ban pynphuh pynphing ia kane ka sngi, ha kane ka sngi la don lang ruh u MDC jong kane ka jaka u Bah EL Nongrang, u Bah R Thangkhiew kum u nongseng, u principal u tynmen basan u Bah T Rani bad bun kiwei ki riew rangbah ka thain.
