Shillong, Naitung 17: U samla Lambokstarwell Marngar President ka Khasi Student Union (KSU) ha kane ka sngi rakhe ia ka lungkhuh sngi iap ba 187 snem jong u Syiem Tirot Sing Syiem u nongialeh laitluid jong ka Ri, la ong kum ki dkhot jong ki seng bhalang bapher bapher ba ia ka malade ban ia buh noh sha dien hynrei buh noh ia ka thong ban shakri ia ka Ri bad ka Jaidbynriew.
U nongialam rangbah ka seng samla pule ka KSU, la pynsngew ruh ba yn naia sha pyndonkam bakla namar la iohi ba kala sdang ka jingshah pynthud ia ka jingiaid lynti jong ki seng bhalang bapher bapher dakiwei ki lat ki lynti ban theh umpjah, hynrei ki smala kiba don ia ka mynsiem kaba shynrang kim dei ban tieng hynrei dei ban iaid sha khmat.
U nongialam ka KSU u la kren bynniaw ba bun sien ki jingiakren kila sah kut tang ha ki saw kyntoh jong ka Secretariat hynrei la ong ba ym dei ban duh jingkyrmen, la pynkynmaw ba ha u snem 2018 kila pynsngew ia ki mat jingdonkam sha ka sorkar bad kawei na kita ka long ba ka sorkar kan wanrah noh ia ka ain ha kaba ia dei bad ka thungkam thung jam kaba long khuid suba.
La ong kaba sngewsih haduh mynta kam pat leh ei ei, u la buh ka jingkylli ioh leh se ka don ei ei sha lyndet, ne lah ban don kata ka jingiabam sap bampong, ha kine ki sngi la ia kren sha rum shaneng ia ka jingbun ki nongtuh ba khyndang ia ki tukan, tuh Type kali bad kiwei, u nongialam ka KSU la kynnoh kaba kham sherkhei kita ki nongthuh ha secretariat, kiba bam kruin ia ka hok jong ki paidbah la kynnoh u President ka KSU.
Ban khanglad ia ki kam bamsap bapong u nongialam ka KSU u la ong ba ka sorkar ka dei ban thaw ia ka rukom trei kam kaba kyrpang ban peit ban khmih na ka bynta ka bamsap bampong hapoh ka jylla baroh kawei, lada kwah ba ka jylla kan kiew ban ioh ia ka jingsynshar kaba khuid ban ioh ia ka jingshaniah ki paidbah ka sorkar ka dei ban leh ia kane.
Kam dei ka kamram jong ki nongthaw ain ban leit sha Secretariat ne sha Assembly ban ia kren, thep Tender hangno shna jaka thew hangno, buh khyrdop hangno, hynrei ka dei ka kamram jong ki ban thaw ia ki ain ban iada ia ka jaidbynriew, ka sorkar kam dei ban ia lehkai ia ki mat jong ka jaidbynriew.
Ha kane ka sngi u president ka KSU la ong ba ka jingdawa ILP ka dang dei ka mat kaba ha khmat, ki paidbah ki iakren shano kan ialam kata ka jingdawa ia ka ILP, ha ka jingiohi ka long ba ka sorkar jylla kala shu kmen tang ba la pdiang ia ka rai ban pyntrei kam ia ka ILP, la pynkynmaw sha ki 60 ngut ki MLA nai ialehkai ia ka sur u paidbah kaba ki la jied, kum ki khun samla kin iailur ia ki dieng tyllaw ban pynrehem ia ka jingialeh.
La ong ba kane ka jingialum lang mynta ka sngi ka lon ban kynmaw tympang ia ka jinglen lade, ka jingaiti bad jingkut jingmut jong u Syiem Tirot Sing na Hima Nongkhlaw haduh bala shah pynryngkang par nala ka jong ka Ri bad ban kut ia la ka jong ka jingim hangthi hapoh Dhaka.
