Ka MDA ne NDA lada ki kwah iaka jingsynshar paidbah shna ia ka ain “Anti-Dynasty Law”: HNLC

Shillong, Jymmang 15: Ka jingpynrung u Mukul Sangma uba long ruh u nongialam ka CLP da la ka jong ka Khun haka jylli ka sain hima ban aireng haka bye election na Ampati ka long sa kawei pat ka jingialehkai ka ban pynneh ia ka jinghiar pateng kawei ka iing,kum kine ki buit treikam ki ktah bha iaka rukom synshar, kynnoh ka seng lehnoh ba la shah niew beain ka HNLC, ha ka kyrwoh kaba la phah mynta ka sngi da u Publicity Secretary u Bah Sainkupar Nongtraw.

Ka long ruh ka jingshisha kaba sngewthamula ba ha u snem 2000 ha ba ka Priyanka Gandhi Vadra ka kha ia u khun shynrang jong ka ,u nongaiktien ka Seng Congress u Ajit Jogi u lah leit sam mitmit pynkloi hapoh ka Headquater ka AICC bad u da pynbna syndon ba ”lah kha ia u khun u ban sa long u Nongialam jong ngi” .

Na ka liang jong ka seng lehnoh HNLC kala kynnoh kum juh ia ka seng National People’s Party ha kaba u hynmen u long u Chief Minister  uba bat halade iaka tnad ka pla tyngka,katba u Para jong u pat u ioh ban bat iaka Home, bad  tang la shem snem ka Para trai jong ki ka Agatha kaba don lang ha kane ka sorkar MDA kan sa long ka MP.

Lada ka ‘Arab Spring’ ka sdang na Tunisia bad ka lah ban ktah ha kiwei ki ri  kum ha Libya, Egypt, Yemen, Syria ,Jordan, Bahrain bad kiwei de ki ri  tang namar ba uwei u nongdie madan u thangim ia lade ban pyrshah jur iaka jingsynshar marwei te sa katno tam lada ki paidbah ha Meghalaya bad ha India kumjuh kin ia khih ban pynkut noh shisyn don ia kum kine ki sain hima kiba hiar pateng beit tang na kawei ka long iing.

Wat ka Ri China kaba dei ka Ri Communist mynta, ka pawnam bha haki por barim bajah kum kine ki jait jingsynshar kiba hiarpateng hynrei mynta kita ki lah duhjait baroh, sa katno tam lei ka India kaba dei ka Ri Synshar paidbah ka dang donkam ban pynduh ia kum kine ki jait jingsynshar.

Na ka liang jong ka seng lehnoh HNLC ka la pynpaw ba ka lah dei ka por iaka Sorkar MDA ne NDA ba lada ki kwah iaka jingsynshar paidbah kaba shisha ki lah dei ban shna bad pyntreikam  iaka ‘Anti-Dynasty Law’ khnang ban pynkut iakane ka jingsynshar  hiarpateng, ong u Bah Sainkupar Nongtraw Publicity Secretary ka seng HNLC.

What Next?

Recent Articles

Leave a Reply

Submit Comment
*