Ka MeECL bad ka MPWU ki lah ban ia pynbeit ban pynioh ia baroh ki hok nongtrei bylla

Shillong, Nailar 20: Kiba trei bylla sngi hapoh jong ka MeECL hapoh ka lama jong ka MeECL Progressive Worker’s Union (MPWU) ki pynpaw ka jingsngewnguh ba lyngba ki jingiakynduh bad meeting kiba bun hapdeng ka management bad ka union, ka management jong ka MeECL ka la kular ban pyntreikam ia ki mat jingdawa jong ka Union bad ban iada ia ki hok nongtrei nongbylla lyngba ka contract agreement ba la pynwandur da ka jingsnewthuh lang bad jingmynjur hapdeng ka management bad ki nongtrei nongbylla hi lyngba ka union ka jong ki.

Ia ki kyndon jong kane ka contract lah ia pynbeit bad iathir sani bha khatduh ha ka meeting kaba la long ha ka 18.06.18. hapdeng ki nongmihkhmat ka Union bad management .Ia kane ka contract agreement la pdiang bad mynjur da baroh ki dkhot ka Union kaba kynthup ia jan baroh ki nongtrei bylla ha MeECL ha ka general meeting kaba la long ha ka 11.08.18.

Kane ka contract agreement ka pynskhem ia ki kam jong ki nongtrei ha kaba ka contract ka don ka jingpynthymmai kam ia ki nongtrei kaba long automatic man la u snem (Automatic annual renewal). Ia ka EPF yn siew 12.5 percent da ka MeECL bad ia ka bhah ba dei ban siew 12.5 percent da ki nongtrei yn siew hi da ka MeECL . Ia ka ESI ruh yn pyntreikam kat kum ki kyndon jongkane ka ain.

Lyngba kane ka contract ki nongtrei kin ioh Casual Leave 15 sngi ha ka shisnem. Bad ka Earned Leave kaba shi sngi ha man ka 15 sngi ia kito kiba la trei shisnem, kata 24 sngi ha ka shi snem, ka ba long ruh ban ioh da ka pisa haba ym shim ia kane ka shuti. Ia ka shuti kha khun (Maternity leave) yn ai 90 sngi khlem da buh kyndon wat lada ioh khun shibun ngut ruh.

Nalor kine ka MeECL ka la pynbeit ban ai increment 5,10 bad 15 percent na ka minimum wage ia kito kiba la trei 5,10 bad 15 snem sha neng. Kane ka pyni ba lada ka bainong sngi ka long 220 tyngka shi sngi, ia kito kiba lah trei san snem kan long  220+PF(55)+Increment (11)=286 shisngi. Ki nongtrei kin ioh ruh ia ka jingsiew kaba arshah haba trei tam ia ki kynta ba dei ban trei.

Ia ka regularisation bad equal pay for equal work ki jingiakren hapdeng ka union bad ka management ki dang iaid bad yn dang bteng.  Ka Union kan ym shong kli kti hynrei kan bud dien bha halor kine.

Ka Union ka kyntu ia baroh ki dkhot ban ym shah ialam bakla, namar ym don kino kino ki kyndon ha ka contract agreement kiba ktah ia ngi ki nongtrei bad ka contract agreement kam mut ba ki kam jong ngi kin kylla long contract kiba tang shi por. Kumta la kyrpad ia ki nongtrei bylla baroh ba kin leit shim copy noh ia kane ka contract agreement na ki controlling officer bad pule bniah bha shwa ban ia soi .

 

 

 

What Next?

Recent Articles

Leave a Reply

Submit Comment
*