Shillong, Iaiong 22: U Working President jong ka Meghalaya State Olympic Association (MSOA) u bah John Kharshiing la iathuh ba ia ka Meghalaya Games 2022 kaba saw kan long hynriew sngi lynter ha u bnai Jymmang u ban wan, kan sdang ha ka 2 tarik bad kan kut ha ka 7 tarik.
Haba kren ha ki lat pathai khubor la iathuh ba kin don khatkhyndai tylli ki jingialehkai ha kane ka kynti kaba mynta bad ka jingialehkai kan long tang ha Shillong ia mynta bad ka jingiakren ban pynlong ha kiwei ki jaka jong ka jylla ha ki por ban wan ki dang iaid.
Ki nongiashim bynta baroh ha kane ka Meghalaya Games kin don 2677 ngut, ki nonghikai bad ki nongpyniaid ki don 296 ngut, ki nongpyniaid ia ki jingialehkai ki don 358 ngut, bad ki nongiarap ki don 380 ngut bad ka sorkar kala mang pisa T.2.23 klur na ka bynta kane ka jingialehkai.
U bah B Diengdoh nongai khubor jong ka MSOA la ong ba ia kine ki jingialehkai baroh yn pynlong ha ki 20 tylli ki jaka ialehkai kiba don ha kane ka nongbah Shillong, u general secretary ka MSOA u bah Finely L Pariat la ong ba u don ka jingkyrmen ba kane jingialehkai kan iaid beit.
