Shillong, Nailur 22: Ka tnat Industries bad Commerce jong ka Sorkar Meghalaya ha ryngkat ka jingiatreilang bad ka tnat Commerce jong ka Sorkar India bad ka Jute Product Development bad Export Promotion Council, DGFT ki la pynlong ia ka Vanijya Utsav halor ka phang, “ka jingpyni ia ka India kum ka bor kaba dang kiew ha ka ioh ka kot”.
Kane ka prokram ia kaba la pynlong lyngba ki lad digital ka thmu ban kyntiew ia ka khaii pateng bad ka jingshalan ia ki mar na ka jylla shabar ri kiba kynthup ia ki mar rep, ki tiar jain, ki tiar shna kti bad kiwei kiwei ki mar kiba dei na Meghalaya. Kum shi bynta ka jingrakhe ia ka Azadi ka Amrit Mahotsav, ka tnat Commerce hapoh ka tnat Commerce bad Industry.
Ka Sorkar India ka dang rakhe ia ka ‘Vanijya Saptah’ naduh ka 20 tarik haduh ka 26 tarik u Nailur 2021 ha kylleng ka ri ban pyni ia ka bor jong ka India bad ki lad na ka bynta ka kam khaii bad ka jingshalan mar shabar ri. Ha kaba iadei bad kine ki jingrakhe, la pynlong ia ki tamasa bapher bapher ha kane ka taiew kiba pyni ia ka roi ka jingkiew ka ioh ka kot.
Ha ka jingai jingkren jong u, u Joint Secretary ka tnat Commerce bad Industry, u Diwakar Mishra u la kyntu ia baroh kiba iadon bynta ha kine ki kam, ki nongrep bad ki nongkhaii ba kin peit bha ia ki mar kiba kyrpang jong ka Meghalaya kiba don ka dor kaba biang. U la ong ruh ba bun na kine ki mar ki la don ia ka jingithuh GI.
U la kyntu ruh ia baroh kiba iadon bynta ha kine ki kam ba kin shim ia ki skhim kiba don hapoh ka tnat Commerce & Industry ban kyntiew ia ka jingshalan mar shabar ri. Shuh shuh, ki jingpyrshang kim dei ban long tang ban shalan mar sha Bangladesh, Myanmar bad kiwei kiwei ki ri hapoh ka thain South East Asia hynrei dei ban buh thong ruh ban poi sha USA bad Europe bad kiwei kiwei ki ri khnang ban ioh jingmyntoi bha.
U la ong ba ka Meghalaya ka kham biang haba ia nujor bad kiwei kiwei ki jylla ka thain shatei lam mih ngi ha kaba iadei bad ka jinglong jingman jong ka suin bneng bad ka jingdon lypa ia ki kam rep khlem ki dawai sboh.
U la ong ba hadien ka jingwan jong ka khlam Corona, ka jingiaidiew jong ki jingbam kiba thung khlem da pyndonkam ia ki dawai ka la kiew bha bad ba baroh ki dei ban shim ia kane ka kabu ban kyntiew ia ka jingshalan ia kine ki mar rep kiba la don lypa ha kylleng ka jylla. Naduh ki por mynshuwa, ka India ka la pynbiang ia ki mar bam kiba biang bha sha kiwei kiwei ki ri ha ka dor kaba duna.
U la kyntu ia ki nongrep, ki nongseng kam lajong, ki nongkhaii bad kito kiba don bynta ha kine ki kam ba kin trei shitom khnang ba ka Meghalaya kan don ka bynta kaba heh ha ka jingthmu jong ka India ban kot sha ka jingshalan mar shabar ri kaba 400 billion dollar ha u snem 2021- 22.
U la ong ruh ba ki don shibun ki lad ban kyntiew ia ka jingshalan mar shabar ri kiba ki briew kim bat peit bha bad halor kane, u la kyntu ia baroh ba kin leh ia kaba donkam.
U la kyntu ruh ia baroh kiba don bynta ha kine ki kam ba kin iashim bynta ha ki prokram bapher bapher ha kylleng ka ri khnang ban iatrei lang ban pynurlong ia kane ka thong ban kyntiew ia ka jingshalan mar shabar ri katba ka ri ka dang rakhe ia ka jingdap 75 snem ka jingioh jinglaitluid.
Ki nongkhaii, ki nongseng kam lajong, ki nongrep, ki nongshalan mar bad ki ophisar jong ka Sorkar Jylla bad ka Sorkar Pdeng ki la iashim bynta ha kane ka workshop ba la pynlong lyngba ki lad digital.
