Shillong, July 19: Ka Meghalaya Residents Safety and Security Acts, 2016 (Entry & Exit Point) kam dei ka dawai kaba lah ban pynkoit ia ka jingpan INFLUX jong ka Jaidbynriew u Hynniewtrep. HYC
Ka HYC kam pdiang da lei lei ruh em baka ain Meghalaya Residents Safety and Security Acts, 2016 kaba la shna da ka Sorkar NDA-II hapoh ka jingialam u Dr Mukul Sangma ka dei ka ain kaban iada ia ki hok Trai Ri ka jong ngi ka Jaidbynriew U Hynniewtrep. Kane ka ain ka long thik kum kato ka ja bym ieh bha ne Khaw-ot kaba la ngi bam ia ka kan pynpang kpoh pynbang ia ngi.
Ka seng horkit hordat kam pdiang ia kano kano ka jingtyrwa ban pdiang ia ka Railway lada la pyntrei kam ia ka Meghalaya Residents Safety and Security Acts, 2016 kaba pynmih ia kita ki Entry bad ka Exit point (Jaka Rung Jaka Mih ki poiwir), Ia ki immigrants Facilitation Centre (Ka jaka iarap ia ki poiwir ban rung ha ka Ri Jylla) bad ia ki kyndon halor ki Nongshongwai.
Ka seng kam pdiang hi ruh ia ka jingkren u Mukul Sangma ba kine ki Entry and Exit point bad kita ki Facilitation Centre for Immigrants ki ia kajuh lane ia syriem bad ka Inner Line Permit (ILP) bad ngi kyntait mardor ia ka jingpynsngewthuh bakla ba kane ka ain kan iada ia ka hok longtrai jong ngi ka jaidbynriew u Hynniewtrep.
Haba ngi pule ia ka Meghalaya Residents Safety and Security Acts, 2016 ngi ioh jingtip ba katkum kane ka ain baroh ki Trai ing kiba thmu ban ai wai kin leit panjingbit kata ka District Task Force ba ki thmu ban ai wai ing bad ka kamram jong ki ka long ba shim ia ka EPIC lane Ration Card jong kita ki Nongshongwai ha ryngkat ki dur jong ki, ka Kot jingpynshisha ia ka jakashong kaba ki shong mynshwa, ka affidavit kaban iathuh ia ka jaka shong kaba u shong mynshwa bad lada ki dei ki Samla Pule kin pynshisha ia ki kot skul jong ki bad kin leit ai pat sha kata ka District Task Force bad ha ki pulit.
Lada kim leh kumne kin sa shah dain kuna kumba 1000 Tyngka. Ki Nongshongwai kiba dei ki Trai Jylla ruh ki hap leh kumjuh kum ki Bar Jylla kata ki hap ai ki EPIC lane ki Ration Card, ki hap leit thoh Affidavit, ki hap ai Certificate shnong , ki hap ai dur bad kumta ter ter. Kine ki kyndon kim donbor ban teh lakam ia ka jingioh shongwai suk ki poiwir bad ki nongleh kam sniew bad kam lah ban pyrkhing ia ka jingwan rung kyrthlep ki poiwir ha kane ka Ri jong ngi.
Hakaba ia dei ba kita ki Entry and Exit point kiba u Mukul Sangma u kop bha ngi shuh kwah ban ong ba ki poiwir kiba thmu ban wanrung ha kane ka jylla kim don kam ia ka sorkar ban iathuh ia ki naei kin rung naei kin mih namar ki la tip hi naei kin rung, haei ki trei, haei kin khaii bad ynda kila shong slem lei lei kim treh shuh hiruh ban mih. Kin sdang pan EPIC ban iohthep vote kin shong lok syndon ha kane ka jylla jong ngi bad kin wan ialam ia kiwei dei ban ia shong shnong noh hakane ka Jylla. Kumta kine ki Entry & Exit Point kim don jingmut eiei ruh em.
Katkum kane ka ain yn don kita ki Facilitation Centre ha ki Entry and Exit Point ha kaba kita ki nongtrei sorkar kiba don ha kine ki Facilitation Centre kin iarap ia ki poiwir ba kin ruh suk khlem ka jingpynthud sha kane ka jylla bad kin iarap ban peit ia ki kot ki sla jong kita ki poiwir. Kine ki Facilitation Centre kin pyntikna ba iaki Hok jong Ki Nong India kiba dei ki barjylla ym dei ban shah pynthud ne shah khang bad kawei na ki hok ki long ban rung laitluid sha kane ka Bri U Hynniewtrep khlem ka jing pynthud. Kum kane ka kyndon kan pynshlur bad ai mynsiem shuh shuh ia ki poiwir ban wan sha kane ka jylla jong ngi.
Kan don jingmut aiu ba ngin ia ong ba kata ka jingai kot ki nongshongwai kan iarap ban teh lakam ia ka jingrung kyrthlep ki mynder namar kin hap ban ai tang ki epic, ki dur bad ki affidavit. Kine ki jingai ia kine ki kot kin nymlah ban pynshisha la u ta u dkhar u la rung na ki entry point, ngim nymtip la uta u poiwir uba rung u la mih ne em na ki exit point, lada um mih yn leh kumno kam ong eiei, lada um rung na entry point yn leh kumno kam ong eiei bad lada um biang ki kot ki sla kata ka District Task Force kam lah ban khang ia uta u poi wir ba un rung hakane ka jylla bad kam lah ban kem iata u dkhar bad pynshitom ia u.
Ka HYC ka buh jngkylli, hato kum kane ka ain kan iarap ia ngi ka jaidbynriew. Kane ka ain Meghalaya Residents Safety and Security Acts, 2016 kam lah khang ia ka jingioh lad ban shong slem jong kine ki poiwir bad ki lah ban shongsah ruh hangne katba ki sngewbit. Lada Ngi ong ba ngi pyrshah Railways namar kan pynshlur ia ki poiwir ban wan rung hakane ka jylla jong ngi ka Meghalaya Residents Safety and Security Acts, 2016 (Entry and Exit Pint) kam dei ka ain kaba lah ban iada ia ka jingrung ki poiwir kumta kam don jingmut ban pdiang ia ka Railways lada la pyntreikam ia ka Entry and Exit Point bad ka Meghalaya Residents Safety and Security Acts, 2016 (Entry & Exit Point) kam dei ka dawai kaba lah ban pynkoit ia ka jingpan INFLUX jong ka Jaidbynriew u Hynniewtrep.
Ka seng ka dawa ba kan don ka ILP kaban teh lakam ia ka jingrung ka jingmih jong ki poi wir ym ka ain kaban iarap ia ka jingrung ki poiwir ha ka jylla jong ngi. Ngi donkam ia ka ILP khnag ba yn lah ban pynshitom ia ki poiwir ba wan rung beain ha kane ka jylla ym ka ain ka bym don bniat ban khang ia ka jingrung ki bar jylla kum kita ki entry and Exit point bad ki Facilitation Centre. Ngi don kam ban teh lakam ia ka jingioh lad jong ki poiwir ba kin shong kin sah slem ha kane ka jylla jong ngi bad ngi don kam ia ka ain ka ban khanglad ia ki poiwir ba kin ioh shongwai khlem ka jingbit na ki bor sorkar.
Ka seng hakaba iadei ba kane ka kam Rung kyrthlep ki poiwir ka dawa ban pyntrei kam ia,Ka Inner Line Permit System kaban Teh lakam ia ka jingrung laitlan ki poiwir ha ka Bri Hynniewtrep. Ka Residential Permit For Immigrants kaban pyrkhing ia ka jingioh shongwai bad Shnong Basa Thurmur ba khlem pud daki Mynder Ha ka Bri Hynniewtrep.
Ka Trading and Business Permit for Non Indigenous People kaban Pyrkhing iaka jingioh Khaii laidlan ki Mynder kaba kynthup ia kiwei dei ki tribal bymdei pat ki trai muluk ka jylla ha ka Bri Hynniewtrep. Ka Work Permit For Non Indigenous People kaban Teh lakam ia ka jingioh Bylla laitlan ki poiwir ha ka Bri Hynniewtrep .
Ban Nang Pynkhlain Shuh Shuh ia ka Prohibition and Detection of Benami Transaction khang ba ynlah ban rat dyngkhong ia ka kam Benami. Iaka State Permanent Citizenship Registration Act kaban shim ia u snem 1971 kum u snem ot kyrteng.Ka Voting in the Place of Origin ka ain kaban khanglad noh ia ki Poiwir bad ki Mynder ba kin ioh Thep Vote ha ka Bri U Hynniewtrep. Ong u Bah Robertjune Khar Jahrin General Secretary ka HYC.
