Shillong, Naiwieng 25: Ka Association of Meghalaya Tradersand Transporters (AMTT) kala leit ban ai ia ka dorkhas sha u myntri rangbah ka jylla u Conrad K Sangma ban kyntu ia ka sorkar ba ka dei ban buh noh ia ki weighbridges ba dei jong ka sorkar bad kane ka dei ka don kam tam ia mynta.
Ha ka dorkhas kaba la phah sha u myntri rangbah ka jylla, la ong ba dang shen kila ioh ia ka jingujor ha kaba ia dei bad ki jaka thew jong ka sorkar bad na ka liang jong ka seng kala kyntu ia kane ka sorkar kaba mynta ba kan phai sha ka “state government integrated checkgate policy of 2010” kaba la shna ha kata ka rukom ban khanglad ia ki jinglum pisa beain da kaba khang ia ki jaka thew jong ki riew shimet ha ka jylla Meghalaya.
Na ka liang jong ka seng kala kdew ha kane ka dorkhas ba ka iing bisahr ba don burom ka Supreme Court kala phah pynsangeh ia katei ka polisi ba rim jong ka sorkar jylla bad ha ka rai jong ka Supreme Court kala pruid dak ba kumno dei ban bud ha kaba buh ia ki jaka thew ha kane ka jylla Meghalaya.
Ka AMTT kala kynnoh ba ka jingshah kynnoh ba kala don ka jinglum pisa jubor da ki kynhun bapher bapher ha kane ka jylla Meghalaya kam dei shuh kaba thymmai, ka sorkar jylla ha u snem 2010 ha dien ba kala sngewthuh ba ka don ka jingdkoh ha kaba pyntrei kam ia ka polisi kala weng noh namar ba dei tang ha kane ka jylla ba don shibun ki jaka thew.
Ha ka Dorkhas ka AMTT kala kdew ba ka sngewlyngoh ban ioh ba kane ka sorkar kaba mynta kala wanrah ia ka “Meghalaya State Policy for Weighbridges, 2018” kaba long markhongpong ia kaei kaba la bethah da ka iing bishar ba don burom ka Supreme Court, kane ka polisi kaba thymmai kam dei kaba thymmai hynrei ka dei kaba shu pynim biang ia kaba rim.
Ka AMTT kala dawa na u myntri rangbah jong ka jylla U Cornad K Sangma ba un weng noh ia ka “Meghalaya State Policy for Weighbridges, 2018” da kaba pyntrei kam noh ia ki ICPs ban pynduna ia ki jaka thew ban lait ki surok bah na ka jingkhapngiah, ka sorkar ka la dei ban wad ki lad ki lynti kiba thymmai ba pynbeit ia kane ym ban leit phai biang sha ka juk rim.
Ka AMTT ka ong ba ki jaka thew ki dei ban dei jong ka sorkar ym ban pyniaid da ki riew shimet. Ka sorkar ka dei ban thied ia ki jaka ne kam shim wai na ki riew shimet ban buh ia ki jaka thew. Ka sorkar kala dei ban plan bha ha kaba ia dei bad kane kakam ba ha ki jaka ba don ki jaka thew ki dei ban biang ki iing na ka bynta ban sah ki nongtrei sorkar kiba dei ha ki jaka thew.
Ka seng ka kdew ba ka jingioh ka sorkar kaba bun dei lyngba kine ki jaka thew, kumta ka sorkar ka dei ban ai kontrak tang ia ka jingtrei ban shna ia ki jaka thew ki iing ki sem bad ynda la dep ka sorkar ka dep ban pyniaid ia ki ym ban aiti sha ki riew shimet. Ka seng kala ong ba ka sorkar kam dei ban ai daw ba kim don briew ban peit ia ki jaka thew la ong u bah Enrico D Pasi , President ka Association of Meghalaya Traders and Transporters (AMTT) ha ka dorkhas kaba la ai sha u myntri rangbah ka jylla.
