Shillong, Naiwieng 30: Ka Red Ribbon Club jong ka MLCU ha ryngkat ka Meghalaya State Network of Positive People (MSNP) ka la pynlong ia ka jingai jinghikai halor ka jingpynduna ia ka jingdih droks.
Ka nongialam jong ka Red Ribbon Club MLCU ha kaba sdang ka prokram kala iathuh ba kane ka jingai jinghikai ka dei shibynta jong ka jingrakhe ia ka World Aids Day bad ka lyngkhuh snem ba 4 jong ka Red Ribbon Club jong ka MLCU.
Ka nongialam haba kren ruh khyndiat shaphang ka rukom treikam 90:90:90 kaba thmu ban iarap ia ki briew kiba ioh ia ka HIV/AIDS da kaba pynthikna ba ha u snem 2020, 90% na ki kin tip thikna la ki don ne em ia u khniang jingpang.
La ong ba 90 % na kiba don ia u khniang jingpang kin ioh ka jingsumar antiretroviral therapy bad 90 % na kiba ioh ia kane ka jingsumar kin lah ban don ia ka jing pynduh bor ia u khniang jingpang HIV ha ka met jong ki.
Ka jingai jinghikai ka la sdang da ka jingkren na I nonghikai na ka tnad Psychology, MLCU iba la batai ba ka jingai jingsumar ia kiba don HIV/AIDS ka dei ban iaid ryngkat bad ka jingsumar ia ka bor pyrkhat pyrdain jong ki namar bunsien kiba don ia u HIV.
Kiba don ia kane ka jingpang ki ju mad ia shibun ki jingshah ibein bad niewbein bad kane ka ktah shibun ia ka jinglong jingman jong ki. Ka jingai jingsumar kam dei ruh kaban shu ai salonsar hynrei ka dei ban iaid katkum ka jingdonkam jong kiba ioh ia ka jingsumar.
Ia ka jingai jinghikai ba kongsan la ialam da u nongmihkhmat ka MSNP uba la batai shaphang ki rukom ba pynduna ia ka jingkyrni droks kiba leh lyngba ki jingai jinghikai paidbah.
Ki jingpyrshang jong ki bor sorkar bad kumjuh da ki jingsumar lyngba ki dawai ia kiba la ngop ha ki droks. U la ban ruh ba khnang ban seisoh kine ki jingpyrshang, ka donkam ia ki briew ban don ka jingiar ka jingmut jingpyrkhat.
Ka la don ruh ka jingiatai halor ka jingshah niewbein bad ibein jong ki briew kiba don ia ka HIV/AIDS ha kaba kane ka jingshah ibein ka kylla long ka diengpyngkiang kaba khraw ia ki ban ioh ka jingsumar kaba biang.
‘La ibein ia ngi kat shaba phai, ym tang ha ki iing ki sem jong ngi hynrei wat ha ki jaka ai jingsumar bad ha ki jaka shakri blei ruh. Ka lad ban jop ia kine kiei kiei ka dei tang lada ki briew ki don ia ka mynsiem ka jingieit, jingpdiang bad jingsngewlem ia kiba ioh ia une u khniang jingpang’ la bynrap u nongai jinghikai.
